Келишип ишлеу хайырын кёргюзтеди

Кёп болмай Битеуроссей халкъ фронтну Къабарты-Малкъарда бёлюмюню, Россейни жолла  жаны бла илму-излем институтуну бла регионну Жол мюлк управлениясыны келечилери «Жашау этерге инфраструктура" миллет проектге  кёре жангыртыла тургъан " Экинчи Чегем - Булунгу" жолгъа къарагъандыла эм тамамланнган ишлеге багъа бергендиле, деп билдиргендиле КъМР-ни Транспорт эмда жол мюлк министерствосуну пресс-службасындан

Сагъынылгъан жол стратегия магъаналыды. Ол Булунгу бла Эл-Тюбю узакъ тау эллени Нальчик бла байламлы этеди, андан сора да,  Чегем ауузну  кёре келген туристле  аны тири  хайырланадыла. Аны себепли ол тынгылы эм къоркъуусуз болуруна аслам эс бурулады.

Бюгюнлюкде тынгылы ремонт ишле  жолну 25 километринде барадыла. Планда белгиленнгенича, тогъуз   кёпюр  да ишленнгенди.  Аны бла бирге жардан таш, топуракъ оюлмазча бетон  хунала жарашдырыладыла, машина тёнгеремезча темир буруула тартыладыла эм жолгъа биринчи къат асфальт салынады.

Ишле ачыкъ халда бардырылыр ючюн КъМР-ни Транспорт эмда жол мюлк  министерство регионну жамауат биригиулери,  Жол управленияны специалистлери  бла бирге  объектлеге къарайдыла, жамауатны жанындан тарыгъыулагъа   эс бурадыла эм къысха заманда  кемчиликлени кетерирча  эсгертиуле бередиле. Быллай байламлыкъ ишни тынгылы эм болжалдан кеч къалмай тамамларгъа себеплик этеди.

Эсге сала айтсакъ, объект  келир жылдан кеч къалмай хайырланыргъа берилирге керекди.