Аналыкъ ахчаны - юйню къурулушуна

Аналыкъ  ахчаны  жашау журт сюерге  сабийге юч жыл толгъандан сора хайырланыргъа жарайды. Бирле,  аны да сакълап турмай, ишни кеслери мажаргъан ахчагъа башлап, юй хазыр болгъандан сора уа, излемле бары да толтурулгъан эселе, къыралдан компенсация аладыла. Къабарты-Малкъарда МФЦ-да бу жумушда болгъан энчиликле бла шагъырейлендиргендиле.

Биринчиден, ана капиталны юйню къурулушуна къоратыр ючюн, жер неда терек бахчачылыкъ участок сатып алыргъа керекди. Ызы бла ишни ким этеригин да билирге. Субсидия аллыкълагъа закон бла чеклениу салынмайды. Башхача айтханда, къурулушну кесигиз, сюйсегиз а подрядчикни чакъырып бардырыргъа эркинсиз.

Аны ишин этгенден сора жер-жерли власть органлагъа къурулушну башларгъа сюйгенигизни юсюнден билдирип, аладан эркинлик алыргъа керексиз. Юйню уллулугъу 500 квадрат метрге жетмей эсе, жаланда билдириу жиберип къояргъа боллукъду, андан уллу объект сюерча уа проектни да кёргюзтюп, эркинлик алыргъа тюшерикди.

Къурулушну подрядчик бардырлыкъ эсе, Социал фонд ахчаны аны счётуна кёчюрлюкдю. Алай болурча ана капиталгъа заявлениягъа къурулушчу бла келишимни да къошаргъа керекди.

Алай ишни сабийни ата-анасы кеслери этерге сюе эселе уа, Фонд ахчаны алагъа эки юлюшге бёлюп берликди: биринчисин – аны излеген кезиуде, экинчисин а эм азындан жарым жыл озгъандан сора. Кесин да иш бошалып, юй да битип алай. Анга шагъатха уа жер-жерли органладан тийишли акт керек боллукъду. Аны, сора ахча кёчюрюллюк счётну Социал фондха жиберирге тюшерикди. Жангы юйде уа юйдегилени хар бирине, ол санда сабийлеге да юлюш чыгъарыргъа керекди - законну излеми алайды.