«Усталыгъымы артыгъыракъда адамлагъа керек болгъаны ючюн сюеме»

Саусузну  аягъы юсюне терк салыуда медсестраланы магъанасы уллуду. Чочайланы Эльвира, Аналаны Ашуканы къызы, аны уста биледи. Ол медсестра болуп  отуздан  артыкъ жылны ишлейди. Бюгюнлюкде Нальчикде биринчи номерли поликлиниканы хирургия бёлюмюню тамата медсестрасыды. Бийик квалификациялы специалистди.

Ауруп, поликлиникагъа келген адам врачдан эсе асламыракъ медсестра бла тюбешеди, иги кесек заманы да  аны бла кетеди. Ол себепден саусузну кёлю кётюрюлюп, жюреги хош болуп кетгени да аны къайгъырыууна, сёзюне, къарамына окъуна кёре болгъаны хакъды.

- Алагъа жууаплылыгъын, адамланы сюйгенин, тёзюмлюгюн да къошарыкъ эдим, - дегенди поликлиниканы  алгъыннгы баш врачы, РФ-ни эмда КъМР-ни сыйлы  врачы Аулиат Каскулова.- Эльвира ма аллайды.  Тизгинли, ариу тилли, айтырын, этерин да билген адамды. 

Эльвирагъа гитчелигинде  тамагъы ауруп,  врачлагъа терк-терк барыргъа тюшгенди. Ол заманда окъуна, къоркъгъанны къой, анга хар зат сейир эди. Сора школда окъугъанында, «Уллу болсанг, къаллай усталыкъ сайларыкъ эдинг?» деген темагъа сочинение жаздырадыла да, ол  саусузлагъа болушургъа сюйгенин билдиргенди. Жаратхан дерслери да  геометрия,  артда уа химия бла биология болгъандыла.

Тамата класслада  уа  медицина училищеге кирлигине ишекли тюйюл эди. Школну бошагъандан сора уа, алай да этгенди. Училищеде фельдшер усталыкъ алып чыкъгъанды. Сора белгили хирург Ботталаны  Хадисге  тюбеп, Республикалы клиника больницаны реанимация бёлюмюнде ишлерге сюйгенин айтханды.

- Ай бла жарым озгъунчу окъуна Хадис Батталович хирургия бёлюмде ишлерге чакъыргъанды. Биринчи заманда бек къоркъа эдим ёлюкледен, хар нени да жюрегим бла ётдюргенме, башыма кёп тюрлю сагъышла, оюмла келе эдиле, бирде ишден къайтсам, сёлеширигим окъуна келмей эди.  Ол манга  къыйын сынау эди.  Алай билмеген затымы  сорургъа уялмай, хар неге юйрене, сынам жыйышдыра баргъанма. Медсестра  жууаплылыкъны бек къаты сезерге керек болгъанына да тюшюннгенме. Усталыгъымы бек сюеме, хакъ, даража ючюн да угъай, адамлагъа керек болгъаным ючюн», -дейди Эльвира.

Алай бла къыз Ботта улу башчылыкъ этген бёлюмде тамата  медсестра болуп ишлейди. Хадис республикалы клиника больницадан кетип, Хасаниягъа кирген жерде экинчи номерли шахар  больницагъа башчылыкъ этип башлагъанында уа, Эльвираны да биргесине алады. Анда да къыз тамата медсестра болуп ишлеп турады.

Пандемияны кезиуюнде да ишинден бир кюнню да айырылмагъанды, къолундан келгенни аямагъанды. Юйюнде уа - баш иеси, сабийлери. Къызы, анасыча, медицинаны сайлагъанды. Бусагъатда колледжде билим ала турады, окъууун андан ары бардырыр муратлыды. Жашы уа  шёндю жаш тёлю сайлагъан IТ технологияла жаны бла билим ала турады. Ол кюндюз анасы ишлеген поликлиникада ишлеп, ингирликде окъуугъа барады.

Быйыл медсестраланы араларында битеуроссей конкурс бардырылгъанды. Поликлиниканы атындан Аналаны къызлары анга къатышып, биринчи, экинчи кезиуюнден да жетишимли ётгенди. Анда хорламы ючюн а дипломгъа, Россей Федерацияны саулукъ сакълау министри М.Мурашко къол салгъан «Саулукъ сакълауда кёп жылланы бет жарыкълы уруннганы ючюн» деген бюсюреу къагъытха тийишли болгъанына шагъатлыкъ этген  письмону алгъанды.

Эльвираны КъМР-ни Саулукъ сакълау министерствосуну кёп саугъалары, грамоталары бардыла. Бек уллу саугъагъа ол саусузларыны ыразы болуп кетгенлерин санайды.