«Биринчи болушлукъгъа» къошула

Нальчикде Росгвардияны КъМР-де Управлениясыны къуллукъчулары эмда ведомствону ветеран организациясыны башчысы Руслан Хужоков «Биринчи болушлукъ» битеуроссей проектге къошулгъандыла. Аны «Биринчилени атламы» жаш тёлю биригиуню регион бёлюмю бла «Россейни къызыл жору» битеуроссей жамауат организация къурагъандыла. 

Проектге медикле-волонтёрла эмда Ново-Ивановское элде 7-чи номерли лицейни кадет классыны окъуучулары да къатышхандыла. 

Росгвардиячыла къонакълагъа сауутланы бла БПЛА-ланы кёрмючюн къурагъандыла. Медицина бёлюмню таматасы полицияны майору Али А. биринчи медицина болушлукъ бериуню жорукъларына юйретгенди, ол санда къоркъуулу болумда адамны саулугъуна хата жетгенде къаллай жумушла толтурургъа кереклисин ангылатханды. 

Ызы бла къонакъла къауумлагъа юлешинип, биринчи медицина болушлукъну жорукъларын къалай билгенлеринде эришгендиле. 

– Быллай жумушла артыкъда магъаналыдыла. Юйрениуледе алгъан билим  адамны саулугъун, жашауун сакъларгъа болушурукъду. Эришиулеге къатышханлагъа барысына да хорлам тежейме, – дегенди  Руслан Хужоков.
Проектни регион бёлюмюнде алчыла битеуроссей чемпионатха къатышырыкъдыла.