Жаш тёлюню сайлауу

Жыл санлары отуз бешге жетмеген, кеслери да креатив индустрияда къармашхан жаш предпринимательлени саны онбир процент болады. Тенглешдирип айтханда, ол аладан тамата къауумдан эки кереге кёпдю – анда бу бёлюмню жаланда беш проценти сайлайды, - дегендиле КъМР-ни Экономиканы айнытыу министерствосунда.

Россейни креатив ыйыгъыны чеклеринде Москвада бардырылгъан «Бизнес интеллектни юсюнден. Креатив жаш тёлю предпринимательствону бюгюннгю кюню эмда тамбласы» деген ушакъны кезиуюнде МСП Корпорацияны башчысы Александр Исаевич былай айтханды: «Жаш предпринимательлени ичинде бу индустрияны кёпле сайлайдыла, бегирекда жыл санлары 25-ге жетмегенле жаратадыла аны».

Къабарты-Малкъарда уа, озгъан айны биринчисине алып къарагъанда, 22,7 минг гитче эмда орта предприниматель бар эди, ол санда 17 минги – энчи предпринимательледиле. Экинчилеринден а кёп къалмай ючден бири (28 проценти) 35 жыллары толмагъан инсанладыла. Тенглешдирип айтханда, ол къыралда орта кёрюмдюден (25 процент чакълы) уллуракъды.

Креатив индустрия дегенде уа, Къабарты-Малкъарда жаш предпринимательле асламысында бу сфераланы сайлайдыла: реклама эм PR, программала жазыу эмда IT. Жаш адамланы асламысы ма аланы жаратадыла, аз кесеги уа ашханала ишлетиу бла кюрешедиле.

«Не сейир, 25 жыллары толмагъан инсанла аладан таматаладан (35 жылгъа дери) эсе азыракъ барадыла блогосферагъа. Аны себепли бу ишге сейир азайып башлагъанын, башха креатив затлагъа уа  ёсгенин кёребиз», - деп чертгенди МСП Корпорацияны башчысы.

Бюгюнлюкге Россейде 4,4 миллион энчи предприниматель барды. Аланы хар тёртюнчюсю  жыл санлары 35-ге жетмеген жаш адамладыла.