«Тепсеу мени жашауумду»

Мусукаланы Зарифни бла Ёзденланы Аминатны юйюр насыплары узакъгъа созулмай къыркъылгъан эди. Аланы къызчыкълары Лаурагъа беш жыл болгъанда, Аминат сабийден ауурлугъу бла тул къалады, Зариф жашлай дуниясын алышхан эди, жаннетли болсун. Аминатны юсюне эки сабийни ауурлугъу тюшгенди. Болсада ол ана, борчун айыпсыз толтура, балаларын, Лаураны бла Эрланны, бир жукъ керекли этмей ёсдюргенди.

Сабийле ёсе келгенлеринде, Аминат аланы сейирлерин эслеп, айнытыр ючюн къолундан келгенни аямагъанды. Лаураны гитчелигинден да тепсеулеге жюреги тарта эди да, аны Тырныауузну Абайланы Солтанбек атлы музыкалы школгъа береди. Биринчи кюнюнден окъуна къызчыкъ тепсеулени бек жаратханды. Хореографиягъа терен сюймекликни да Лаурагъа аны устазы Юлия Георгиевна Майборода сингдирген эди.

Алай бла Лаура Тырныауузну Абайланы Солтанбек атлы искусстволаны школуну тепсеуле бёлюмюн бошайды. 3-чю номерли школну да тауусхандан сора, усталыкъны сайлау къыйын жумуш болмайды. Ол сабийликден умутуна кертичиди. Алай бла ол Искусстволаны Шимал-Кавказ къырал институтуну хореография бёлюмюне киреди. Анда юч жылны окъугъанындан сора, солуугъа юйге келе туруп, маршруткада тенг къызы бла ушакъ эте келгенин Тырныауузну Къулийланы Къайсын атлы Маданият юйюню таматасы Бауаланы Аминат эшитеди да, хапаргъа къошулуп, Лаурагъа бир айгъа Маданият юйде зал берип, фахмусун-хунерин да ачыкълар онг береди. Жаш хореограф анга бек къууанады. Теорияда алгъан усталыгъын сынар ючюн аламат онг эди ол.

Алай бла тепсеу къауумла ачылгъанларыны юсюнден хапар жайылады. Жыл санларына кёре, тёрт уллу къауум, сабийле бла абаданла да, жыйылады. Лаура да ала бла ишлеп башлайды. Жаланда къызланы юйрете эди. Бир ай бла жарымны ичинде Шимал Кавказны миллетлерини тепсеулерине юйренедиле. Жайны ахырында аталагъа бла аналагъа ачыкъ дерсле этип, неге юйреннгенлерин кёргюзтедиле. Бу курсла хакъ бла болсала да, кёпле жюрюй эдиле. Атала бла анала балаларыны жангы ачылгъан фахмуларына бек къууаннгандыла.

Алай бла бу ишни мында суралгъанын кёрген жаш хореограф, окъууун битдирип, ызына къайтыргъа таукелленеди. 2022 жылда диплому бла къайтханында, аны районну Маданият управлениясына чакъырадыла ишге. Болсада Лаура жаланда кеси аллына, кеси оюмуна кёре ишлерге сюйгени ючюн бир учреждениягъа байланмайды. Кеси аллына ишлеп башлау тынч тюйюл эди. Биринчиден мекям излейди, аны тапханындан сора уа, аны тепсеулеге юйренирча жарашдырыргъа керек эди. Жаш устаз, къоркъмай, ол атламны да этеди. Бу жумушда анга атала бла анала уллу билеклик тапдыргъандыла. Ремонтун келишдирип, залны тёгерегине салырча кюзгюле да аладыла. Бюгюн Лаура алагъа, уллу ыразылыгъын билдире, ыспас этеди.

Тепсеулени къураргъа бла комбинацияла жарашдырыргъа институтда алгъан билими болушады. Бюгюнлюкде ол юйретген сабийле кеслерине кийимле да алгъандыла. Эришиулеге эркин къатышыр ючюн, жаш хореограф кеси аллына энчи предприниматель болургъа тийишлиди. Къысха заманда ол жумушну да къолгъа алыр муратдады. Сора аланы республикалы, федерал даражалы эришиулеге къатышыр онглары боллукъду. Тойлагъа да чакъырадыла тепсеген къызланы, баш ау алгъан адетге къатышырларын да излеучюдюле. Къауумланы юйретгенинден тышында, энчи дерсле алыргъа да кёпле сюедиле.

- Тепсеу мени жашауумду десем, ётюрюк айтырыкъ болмам. Нек дегенде ол сабийликден муратымды, усталыгъымды, хайыр келтирген ишимди, жюрегими кёкге учургъан сезимимди. Аны себепли ол жаланда ишимди дерге жарамаз. Сабийлени биргелерине тепсейме, арталлыда арымайма. Кюннге бир ненча дерс берсем да, къайдан кюч келгенин кесим да ангылаялмайма. Илхамым береди кюч манга. Миллет тепсеулеге юйренирге сюйгенлени санлары кёбейе барады, - дейди жаш хореограф.

Бусагъатда юйретген къызчыкълары Лаураны кесича тепсегенлери аны бек къууандырады. Ала ол берген дерслеге кёре тепсей билгенлери бла ёхтемленеди. Алай болгъанлыкъгъа, ол алгъан усталыгъы бла чекленип къалмайды, тепсеулеге жораланнган мастер-класслагъа жюрюйдю, билимин ёсдюреди. Умутла кёпдюле, кюч да барды, жаланда сабийлени жанындан бу ызгъа сюймеклик болса.