Бушуу кюннге аталып

Нальчикге чабыуул этилгенли 20 жыл ётгенине жораланып, «Гладиатор» спорт арада 2012-2013 жыллада туугъан жашчыкъланы араларында дэюдодан  эришиу къуралгъанды. Ол Россейни бла Къабарты-Малкъарны гимнлеринден, шахарны къоруулай жан берген жигитлени хурметлерине бир минутну шош туруудан башланнганды.

Спортчуланы, тренерлени бла къараучуланы Парламентни билим бериу, илму, физкультура, спорт эмда жаш тёлюню ишлери жаны бла комитетини башчысы Нина Емузова, спорт министрни орунбасары Заур Хежев, ОВД-ны ветеранларыны регионда бёлюмюню башчысы Муаед Пихов, дзюдодан С.Х. Ниров атлы спорт школну башчысы Сафарби Таов эм башха сыйлы къонакъла алгъышлагъандыла. Тюбешиулерин ахшы бардырып, майдаллагъа ие Биттирланы Амирхан, Ренат Шокуев, Баллиланы Ибрахим, Алан Тлугачев, Айдамир Мудранов, Хутуйланы Ибрагим, Азнаур Махов эм башхала болгъандыла. 

Бу кюннге аталып, спортну бирси тюрлюлеринден да эришиуле ётдюрюлгендиле. Алай бла грек-рим тутушуудан сынаулагъа 95 умутландыргъан гёжеф келгендиле, аладан алчы жерлеге Байчеккуланы Эльдар, Айрат Яганов, Чочууланы Имран, Гайыланы Мансур, Муаед Бабашев, Отарланы Залим, Тёппеланы Жамал дагъыда талайы чыкъгъандыла. Эркин тутушууда Жангоразланы Хасан, Мызыланы Адам, Таукенланы Атмир эм башхала хорлагъандыла.

Нальчикден, Нарткъаладан, Басхандан, Шалушкадан, Терекден бла Прохладныйден жаш футболчула уа ара шахарыбызны сабий стадионунда жыйылгъандыла. Эм ахшы шалушкачыла ойнагъандыла, экинчи жерни – Нарткъаланы къаууму, ючюнчюню уа Басханны келечилери алгъандыла.