Мекям жарыкъды, кенгди

КъМР-ни Жарыкъландырыу эмда илму министерствосуну 1-чи номерли школ-интернатда коррекциялы класслада окъугъан къызчыкълагъа бла жашчыкълагъа таплыкъгъа деп  жангыртылгъан бёлюм тынгылы ремонт этилгенден сора хайырланыргъа берилгенди. Аны къууанчлы ачылыууна  КъМР-ни жарыкъландырыу эмда илму министри Анзор Езаов, окъуу юйлени башчылары, къурулушчула, устазла, ата-анала да къатышхандыла.

Къонакъла бек алгъа  жангыртылгъан мекямны жокълагъандыла. Ала эркин класслагъа, шёндюгю заманны излемине тийишли оборудование бла жалчытылгъан кабинетлеге, сабийле солургъа боллукъ, къол-бет жуугъан  жерлеге да къарап, алагъа бюсюрегендиле. 

Анзор Езаов саулукълары бла байламлы чекленнген онглары болгъан сабийлеге  мында хар зат да эсге алынып ишленнгенине ыразылыгъын билдиргенди.  Школ-интернатны коллективине да усталыкълары эмда халаллыкълары ючюн да ыспас этгенди.
Андан сора министр устазланы бла юйретиучюлени бир къаууму ишлерине жууаплы кёзден къарагъанлары, бет жарыкълы уруннганлары ючюн да грамотала эмда бюсюреу къагъытла бла саугъаланнганларын билдирип, аланы бергенди.

Окъуу юйню таматасы  Балкъыз Захохова жангыртылгъан окъуу мекямны къууанчлы халда ачылыууна келгенлеге ыразылыгъын билдиргенди эмда барыны да кючлери бла  бу мекям шёндюгю заманны излемине келише эсе, ол мында ким да сюйюп турурча болгъан эсе, анга кёплени къыйыны киргенин айтып, алагъа ыспас этгенди.

Ол кюн интернатда тургъан, окъугъан сабийле да  той-оюн къурагъандыла. «Сценическая магия –школьный инклюзивный театр» деген проектни чеклеринде къуралгъан  сахна оюн да кёргюзтюлгенди. 

Ахырында уа сабийле, абаданла да  Бабаланы Муслим бла бирге «Сансара» деген жырны айтхандыла, къонакъла бла бирге суратха да тюшгендиле.