Айырмалыланы санында

Жыл сайын Россейде «Жылны юйюрю» деген конкурс бардырылады. Быйыл бла ол ХХ кере ётеди. Ары хар региондан да бирер юлгюлю юйюрню сайлап кёргюзтедиле. Бу жол бизни республикадан анга Къашхатаудан Чеченланы Эльдар бла Фатима эм аланы 5 сабийлери къатышхандыла. Саулай да конкурсха 10 мингден артыкъ заявка берилген эди. Регион кезиуледен сора россей даражагъа 460 заявка сайланнганды, ол санда энчи аскер операциягъа къатышхан «Ата журтну къоруулаучула» деген фондну Къабарты-Малкъарда регион бёлюмюню таматасыны орунбасары Чеченланы Эльдарныкъы да. 

Конкурсну «Ата журтну къоруулаучуну юйюрю» деген номинациясыны финал кесегине Шимал- Кавказ федерал округдан Чеченлары бла бирге РСО-Аланиядан бла Ингушетиядан да эки юйюр чыкъгъандыла. 
15 октябрьде Москвада «Россей» Миллет арада финалгъа чыкъгъан 89 юйюрню эм хорлагъанланы саугъалау ётгенди. Башда белгиленнген номинацияда Чеченланы юйюр алчы 15 юйюрню къауумуна тюшгенди. Бюгюнлюкде Эльдар бла Фатима 4 къыз бла бир жаш ёсдюредиле. Аланы бу даражалы конкурсда хорлагъанлары барыбыз да ёхтемленирча шартды.

Юйюрлени алгъышларгъа уа ол кюн россей эстраданы жулдузлары Лев Лещенко, Александр Маршал, Валерия эм дагъыда башхала келген эдиле.