Алчылыкъны ычхындырмагъандыла

11-12 октябрьде Элбрус районну Тегенекли элинде право низамны сакълаучу органлада къуллукъларын толтура ёлген полициячыланы хурметлерине каратеден регионла аралы турнир бардырылгъанды. Анга СКФО-ну жер-жерлеринден 300-ге жууукъ спортчу къатышхандыла. 

Командалы эсепде бизни спортчуларыбыз биринчи жерге чыкъгъандыла, Ставрополь край – экинчи, Дагъыстан ючюнчю сыйлы жерни алгъанды. Нальчикден «Чемпион» клубну келечилери командагъа сегиз алтын, жети кюмюш, сегиз да доммакъ майдалла келтиргендиле. 

Кесини ауурлукъ къауумунда Нёгерланы Маликге (30 кг) жетген болмагъанды. Идар Бежанов (34кг), Изабелла Блиева (32 кг), Кемран Зухов (40 кг), Ваник Григорян (50 кг), Текуланы Алим (61 кг), Алихан Назранов (68 кг), Алишер Элчепаров (76 кг) да биринчи жерни кишиге ычхындырмагъандыла. Текуланы Алий, Амир Кушхов, Адам Кампаров, Мухаммад Боронов, Дамир Кунижев, Диана Батова, Астемир Зашаев, Эльдар Казанчев, Сафия Эдгулова, Эльдар Мусаев, Асана Мачанова экинчи эм ючюнчю жерлеге чыкъгъандыла. Хорламгъа чыкъгъанланы кубокла эм ахча бла да саугъалагъандыла.

Жаш спортчуланы «Чемпион» клубну тренерлери Аслан Губашиев, Рустам Кампаров, Азамат Мешев, Ислам Шомахов юйретедиле.