Жангыртыу жумушланы баргъанын кёргенди

Россейни Къырал Думасыны депутаты Виктория Родина партия контрольну чеклеринде Прохладна районда билим бериу учрежденияланы къурулушларында болгъанды. Ол «Жаш тёлю эм сабийле» миллет проектни чеклеринде озгъан ёмюрню 70-чи жылларында ишленнген школланы мекямлары къалай жангыртылгъанларын кёргенди, деп билдиргендиле kabardin-balkar.er.ru сайтда.

- 2-чи номерли гимназия бла адмирал А.Г. Головкону атын жюрютген 4-чю номерли школ жангыртыу жумушладан сора быйыл 1 сентябрьде сабийлеге эшиклерин ачаргъа керек эдиле. Алай партияны приёмныйине бу борчла толтурулмагъанларын билдирип, ата-аналадан тарыгъыула келгендиле, - дегенди депутат.

Виктория Родина къурулушлагъа Прохладныйни башчысы Кирилл Кожухов бла бирге келгенди. Шахарны таматасы айтханыча, тийишли жангыртыу жумушла бардырылгъан кезиуде энтта кемчиликле ачыкъланнгандыла. Аны ючюн болжалла созулгъандыла.

- Жангыртыу жумушла ахырына жете тургъанларын кёргенбиз. Мекямладан биринде мебельни бла окъуу кереклени салып башлагъандыла. Кюз арты солуудан сора окъуучула, ала уа эки мингнге жетедиле, жангыртылгъан, шёндюгю излемлеге келишген школлагъа къайтырыкъларына ышанама, - дегенди Виктория Родина.