УФСБ: Биягъы наркотикле келтиргендиле

Россейни ФСБ-сыны КъМР-де Управлениясыны къуллукъчулары, Россейни МВД-сыны Шимал-Кавказ федерал округда бёлюмлерини болжаллы халда оператив къауумуну эм КъМР-де Ич ишле министерствосуну полициячылары бла бирге наркотиклени законсуз сатыу-алыугъа къажау излеу-тинтиу жумушла бардыргъан кезиуде Ставрополь крайдан А.Н.Куприянованы аманлыкъчы ишин тыйгъандыла.  Ол наркотиклени регионнга ташыуну къураргъа умут этгенди.

Кюч ведомствону пресс-службасындан бизге билдиргенлерича, законсуз сатыу-алыудан 663 грамм наркотик сыйырылгъанды.

КъМР-ни Зольск районда сюдю А.Н. Куприянова РФ-ни УК-сыны 228-чи статьясыны 2-чи кесегине, 30-чу статьясыны 3-чю кесегине, 228.1-чи статьясыны 4-чю кесегини «г» пунктуна, 30-чу статьясыны 3-чю кесегине, 228.1-чи статьясыны 5-чи кесегине бузукълукъ этгенин тохташдырып, аны эркинлигин 7 жылгъа сыйырыргъа деген оноуну чыгъаргъанды, ол кючюне киргенди. Тиширыу битеулю низамлы колонияда тутуллукъду.