Ананы кюч жыярча эркин заманы болургъа керекди

10 октябрьде Психика саулукъну халкъла аралы кюню белгиленеди. Ол жамауатны психика жаны  бла ауруулары  болгъанлагъа эс бурур, алагъа болушлукъну кенгертир, жамауатны битеулю саулугъун игилендирир мурат бла бардырылады. Сау  ыйыкъны ичинде - 6-12 октябрьде  - РФ-ни Саулукъ сакълау министерствосу Психиканы сакълауну ыйыгъын бардырады.

Аны чеклеринде биз КъМР-ни Саулукъ сакълау министерствосуну Психиатрияны бла наркологияны республикалы арасыны клиника психологу Элина Орквасова бла ушакъ этгенбиз. Ол хар кюн да психика жаны бла  ауруулары болгъан сабийчикле бла кюрешеди.  Быллай къыйын болумгъа тюшген  баланы анасы, сёзсюз, кюн сайын сынаулагъа тюбейди, жюреги къыйналады. Ол себепден тиширыугъа кесини психика болумун сакълагъан магъаналыды.  

- Аналыкъ – жууаплы ишди.  Ол тиширыуну къарыуун, ич дуниясын, сезимлерин тюрлендиреди. Алай саулукъларына кёре чекленнген онглары болгъан балаланы  аналарына уа жигитледиле. Аны ючюн бу къарыулу тиширыулагъа саулугъугъузгъа сакъ болугъуз деригим келеди,-дейди психолог.

Аны айтханына кёре, баласына багъыуну женгиллетир ючюн аны къыйнагъан аурууну юсюнден толу хапар билирге керекди. Ол кезиуде болушлукъ бютюнда  хайырлы,  тамамланнган жумушла уа ышаннгылы боллукъдула. Экинчиден, ана кесини саулугъуна къайгъырыргъа борчлуду.

- Таза хауа бла солургъа, паркда жаяу жюрюрге, спорт бла кюреширге, заманында  жукъларгъа, саулукълу аш ашаргъа тийишлиди.  Дагъыда акъылы, санлары солурча жюреги  сюйген ишни сайларгъа керекди: сурат ишлеген, йога, алача башхала. Алай айтырыгъым,  ананы кесини психика саулугъун игилендирирча эркин заманы болургъа керекди. Баласын къайда къойсун деп сорургъа боллукъсуз. Бу кезиуде уа сабийни атасы, башха жууукъла кеслерини къайгъырыулукъларын, юйюрню аллында жууаплылыкъларын толтурургъа керекдиле. Кеси аллына тиширыу битеу жумушланы толтураллыкъ  тюйюлдю, анга  болушургъа, кюч берирге  керекди,- дейди Элина Орквасова.

Аны бла бирге саусуз сабийге къарагъан анагъа  психологну болушлугъу да магъаналыды. Ол а жангырыргъа, акъылын, сезимлерин бир ызгъа салыргъа онг берликди, дейди ушакъ нёгерибиз.