Атлары – ёмюрлюк махтаулукъну тизмесинде

  13 октябрь – Къуллукъларын  толтура ёлген полициячыланы эсгериуню кюню

Милицияны капитаны Тамирлан Алиевич Казиханов РФ-ни МВД-сыны Юг федерал округда Баш управлениясыны  терроризмге къажау Шимал-Кавказ арасында пресс-службагъа башчылыкъ этип тургъанды. 2005 жылны 13-чю октябринде Нальчикде боевикле чабыууллукъ этген кезиуде алагъа къажау сюелгенлени ал сатырларында болуп, къуллукъ борчларын толтура ёлгенди.

Ол кинокамерасы бла «сауутланып» эди:  бола тургъан ишлени алдыра тургъанлай, снайпер аны марап, алай ёлтюргенди. Бандитле Тамирланны билгендиле, аны «сауутундан»  тюз да «Т» араны башха офицерлерини автоматларындан эмда гранатомётларынданча къоркъгъандыла.

Россей Федерацияны Президентини Указы бла  милицияны капитаны Тамирлан Алиевич Казиханов Кишиликни ордени бла саугъаланнганды (ёлгенден сора). Россейни МВД-сыны буйругъу бла уа аны аты Россейни МВД-сыны ЮФО-да Баш управлениясыны энчи къауумуну тизмесине кийирилгенди.

Милицияны кичи лейтенанты Моллаланы Маратны жашы Хамзат  КъМР-де  МВД-ны УГИБДД-сыны жол-патруль службасыны энчи батальонуну инспектору болуп къуллукъ этгенди. 2005 жылда 13 октябрьде боевиклени къаууму урланнган женгил машинада шахаргъа Хасания жанындан кирирге умут этгендиле. Постда  жол-патруль къуллукъларын бардыра тургъанла аланы алларын тыйгъанларында, аманлыкъчыла алагъа автоматладан бла гранатомётладан аяусуз атдырып башлагъандыла.

ДПС-де къуллукъ этгенле да артха турмагъандыла, алагъа къажау от ачхандыла.  Атышыуну кезиуюнде Хамзат ауур жаралы болады. Боевиклени окълары аны жашауун юзедиле.

Ол халал жюрекли, тюз ниетли адам болгъанды, жашаугъа сюймеклиги бла тёгерекни жарытханды.

Милицияны подполковниги Руслан Асланбиевич Калмыков КъМР-де МВД-ны  криминал милициясыны энчи бёлюмюню командирини орунбасары болуп къуллукъ этгенди. 13 октябрьде ол ишчи нёгерлери бла бирге шахаргъа коллегаларына болушур ючюн тебирегенди. Ленин эмда Кулиев атлы  орамла бирге тюбеген жерде аланы машиналарына боевикле от ачхандыла.  Ала бла атышыуда  милициячыла бешеуленни ёлтюргендиле, бирин да жесирге алгъандыла.

Руслан кеси эки боевикни жокъ этгенди. Андан сора аны нёгерлерини бир къаууму Ленин атлы  орам бла 2-чи ОВД-ни мекямына тебирегендиле. Анда атышыу бара тура эди. Боевикле милициячыланы илишаннга алып атдыра эдиле. Ол кезиуде рация бла Крупская атлы китапхананы аллында жаралы милициячы жатып тургъаныны юсюнден билдиредиле. Руслан, не да этип, анга болушургъа умут этеди.  «ГАЗелини» арт эшигин ачханда, кёкюрегине окъ тиеди да, алайда аны жашауу юзюледи.

Милицияны капитаны  Хызыр Ойтов Нальчикни администрациясыны ич ишле управлениясыны 3-чю бёлюмюнде участковый болуп къуллукъ этгенди. Ол бушуулу кюн   бёлюмню мекямына боевикле чабыууллукъ этгенлерин эшитип, терк окъуна ары жетеди. Ишчи нёгерлерине болушур мурат бла  ичине кирирге кюрешеди. Ол заманда анга боевикле  от ачадыла. Ол кёп  жараларындан ёледи.

Ишчи нёгерлери аны сёзюне кертичи болгъан, ишин сюйген адамныча эсгередиле. Ол бир участкада жети жылны къуллукъ этгенди. Ол тийреледе жашагъанладан кёплери аны тюз да бир жууукъ адамларынача сюйгендиле.

Милицияны майору Ибрагим Удаевич Сусаев «Т» арада къуллукъ этген нёгерлери бла бирге Акъ-Суудан ваххабитлени сауутланнган къауумуна къажау операциядан къайтып келе болгъандыла. Машинасы бла Араны къатына жууукълашханда, атышыу аямай бара тура эди. Ибрагим автомат тауушла чыкъгъан таба чапханды, алай жаралы болуп, бордюр артына  бугъунады.  Къоншу юйден  биреулен чабып келип, анга болушур умут этеди, алай Ибрагим унамайды, аны къоркъуусуз жерге кетерин излейди.

Майорну узакъдан атдырып ёлтюргендиле. Боевикле аны ёлюгюне окъуна жууукълашыргъа къоркъуп, автоматдан бир ненча минутну атдыргъанлай тургъандыла.

Россей Федерацияны Президентини Указы бла  милицияны майору Ибрагим Удаевич Сусаев Кишиликни ордени бла саугъаланнганды (ёлгенден сора). Россейни МВД-сыны буйругъу бла уа аны аты Россейни МВД-сыны ЮФО-да Баш управлениясыны энчи къауумуну тизмесине кийирилгенди.