Ыспас сёзле, жырла эмда тепсеуле

Нальчикде Музыкалы театрда  Устазны кюнюне жораланып къууанчлы жыйылыу болгъанды. Анга республиканы районларындан, шахарларындан бла эллеринден устазла бла юйретиучюле чакъырылгъан эдиле.

Сыйлы къонакъланы араларында КъМР-ни Парламентини Председатели Татьяна Егорова,  КъМР-ни Башчысыны  Администрациясыны таматасы Мухамед Кодзоков, КъМР-ни Правительствосуну  Председателини орунбасары Залим Кашироков, КъМР-ни жарыкъландырыу эмда илму министри Анзор Езаов, муниципал районланы эмда шахар округланы башчылары, билим бериу управленияны муниципал органларыны оноучулары да бар эдиле.

Бек алгъа Мухамед Кодзоков КъМР-ни Башчысы Казбек Коковну   алгъышлау сёзю бла шагъырей этгенди. Ызы бла  2025 жылда профессионал  усталыкъларына кёре тюрлю-тюрлю конкурслада  хорлагъан эмда алчы жерлеге чыкъгъан  къауум устаз КъМР-ни Башчысыны саугъасына тийишли болгъанларын билдирип, аланы иелерине бергенди.  Ол сыйгъа тийишли болгъанланы араларында Булунгуда информатикадан окъутхан, «Жылны устазы»  конкурсну регион кесегинде хорлагъан Аппайланы  Альберт,  Элбрус районну регион колледжини преподаватели, «Жылны устасы» конкурсну регион кесегинде хорлагъан  Къазакъланы Фатимат да болгъандыла.

 Татьяна Егорова уа кесини урунуу жолун устазлыкъдан башлагъанын, аны себепли  аланы ишлерин  бирле айтып угъай, кеси  сынап билгенин эсгергенди. «Хар бирибиз да биринчи устазын, насийхатчысын эсибизде тутабыз. Олду  бизге билимни дуниясын ачхан, энчи жолубузну табаргъа болушхан. Сайлагъан усталыгъыгъыз   жол нёгеригиз болуп къалады. Кеси да уллу тёзюмлюкню, ауур акъыллылыкъны эмда сабийлеге чексиз сюймекликни излейди. Сиз, билим бериу бла чекленип къалмай,  хар окъуучугъузну къылыгъында кеси ызыгъызны къоясыз, алай бла республикабызны, къыралыбызны келир заманыны тёлюсюн ёсдюресиз. Магъаналы  иш тамамлагъаныгъыз, халал жюрегигиз, сабийлерибизге анача, атача къайгъыргъаныгъыз  ючюн аллыгъызда баш урама»,-дегенди.

Андан сора Татьяна Борисовна  бир къауум устазгъа, юйретиучюге, преподавательге да КъМР-ни Парламентини Сыйлы грамоталарын, Бюсюреу къагъытларын, саугъаларын да  бергенди. Алагъа тийишли болгъанланы араларында  Элбрус районну Билим бериу управлениясыны  методика кабинетини башчысы  Бапыналаны Элина да болгъанды.

Устазланы   Залим Кашироков да алгъышлагъанды. «Ёсюп келген тёлюню тюз ниетли ёсдюрюуге салгъан къыйыныгъыз чексиз уллуду. Сиз сабийлерибизни жюреклерине  Ата журтха, аны тарыхына, адет-тёрелерине  сюймекликни  сингдиресиз. Бусагъатда окъуучуларыгъызны иги кесеги энчи аскер операциягъа къатышадыла, Ата журтну сейирлерин къоруулайдыла. Биз сизни  бла  ёхтемленебиз», - дегенди.

Ызы бла  бир къауум адамгъа  республиканы Правительствосуну атындан  Бюсюреу  къагъытла, саугъала, гюлле да бергенди. Аланы араларында  Элбрус районда регион колледжде ингилиз тилден  устаз  Къазакъланы Фатимат да болгъанды.   Черек районну Бабугент элини  школунда орус тилден бла адабиятдан окъутхан устаз Бёзюланы Маржан а КъМР-ни Правительствосуну  Сыйлы  грамотасына  тийишли  болгъанды.

КъМР-ни жарыкъландырыу эмда илму министри Анзор Езаов кесини къысха сёзю бла устазланы жюреклерине жетмей къалмагъанды. Нек дегенде министр ала эшитирге сюйген, керти да огъурлу сёзлени айтханды. «Республиканы Жарыкъландырыу эмда илму министерствосу  сизни ишигиз, жашауугъуз да не къадар женгил болурлары ючюн  кюн сайын да къайгъыргъанлай турады», - деп, министерствону   дипломларын талай устазгъа  бергенди. Аланы алгъанланы араларында «Ана тилни эмда адабиятны окъутуу жаны бла эм иги устаз» битеуроссей конкурсну регион кесегинде лауреат болгъан устазла болгъандыла: Нальчикде  77-чи номерли сабий садны юйретиучюсю Занкишиланы Аминат, Тырныауузну 1-чи номерли  лицейини тарыхдан устазы, «Эм иги жаш устаз»   конкурсну  регион кесегинде биринчи жерни алгъан  Мирзойланы Салим, бу лицейни   «Энчи сабий» ресурс арасында  ишлеген, «Россейни устазы-дефектологу» регион конкурсда  айырмалы болгъан Аккайланы Зайнаф болгъандыла.

Черек районну  Сабийлени эмда жаш тёлюню айнытыу жаны бла  къошакъ билим берген арасында ишлеген  Акъшаякъланы Альбинаны, дагъыда кёп   башхаланы ишлери  Россей Федерацияны  Жарыкъландырыу  министерствосуну бюсюреуюне тийишли болгъандыла.

Къууанчлы жыйылыуда  жюрекге жетген  кезиуле да болгъандыла. Шахарны кичи классларыны окъуучулары билим бериуде кёп жылланы  ишлеген ветеранланы гюл къысымла бла къууандыргъандыла. Алай бла ала  чачларын акъ басхан устазлагъа хурметлерин кёргюзтгендиле. Ол иш а тёлюлени араларында байламлыкъны кючлендирген, ахшы тёрелени сакълагъан кёпюрдю деп, таукел айтыргъа боллукъду.

Байрамны бютюн жарыкъ, бютюн ариу этер ючюн а,  республикада атлары айтылгъан артистле Текуланы Амур, Жаникаланы Эльдар, Султан Хажироков, Тамерлан Маргушев, Карина бла Ислам  Киш, Карина Догова, дагъыда  «Арабеск», «Каллисто» эмда «Кавказны танглары»  хореография коллективле хунерликлерин, жюрек жылыуларын да аямагъандыла.

                                                х х х

Къууанчлы жыйылыу бошалгъандан  сора мен, Занкишиланы  Аминатха тюбеп, ушакъ этгенме.  «Бюгюннгю саугъам - ол жаланда мени  жетишимлериме берилип къалгъан бийик белги тюйюлдю, республикада  ана тиллени окъутхан битеу устазланы  даражаларын бийикге  кётюрюудю.  Правительствобузгъа, Жарыкъландырыу эмда илму министерствогъа да биз тамамлагъан  ишге быллай уллу  магъана бергенлери ючюн  чексиз  ыразыма. Сёзсюз, ол кёллендиреди», - дегенди ол.