Уллу кёллюлюк игиликге келтирмейди

Кёп болмай «Россети Северный Кавказ» - «Каббалкэнерго» компанияны  Нальчикде бёлюмюню келечилери ток ючюн аслам заманны тёлемей тургъанланы жокълагъандыла. Быйыл сентябрьге чыгъарылгъан эсеплеге кёре, ток ыздан кесерча 13054 заявка берилгенди. Аланы борчларыны ёлчеми 34,4 миллион сомгъа жетгенди. Аладан  11 594 абонент токсуз къалмаз ючюн борчларын жабаргъа ашыкъгъандыла. Болсада  1 171 юйню энергокючден кесерге тюшгенди. Саулай алып айтханда, аланы 4 миллион сомдан  аслам берликлери барды.

Энергетикле  эркинликсиз кеслери алларына ток ызлагъа къошулгъан борчлуланы да ачыкъларча рейд бардыргъандыла.  Аны чеклеринде   253 фатарда бузукълукъ этилгени билиннгенди.  Ала бла байламлы материалла ич ишлени келечилерине берилгендиле. Эркинликсиз, ол санда эсеплеген приборсуз токну хайырланнганла (урлагъанла) административ эм уголовный жууапха тартыладыла. Анга кёре, энчи иелиле 10-15 эм организацияла уа 100-200 минг сом тазир тёлерге тюшерикдиле.

Эсге сала айтсакъ, эки айдан аслам тёлемеген абонент  ток ыздан кесилирге боллукъду.  Аллай адам  ток бла жалчытылыныр ючюн борчун толсунлай жабаргъа тюшерикди. Ол санда ток чыбыкъны кесгенлерине эм къошханларына да кеси тёлерикди. Аны ёлчеми  объектни къыйынлыгъына кёре  болады. Сёз ючюн,  энчи арбазны иеси 3 минг, организацияны таматасы уа  10 минг сом берликди. Уголовный жууапха тартылгъанла уа РФ-ни Уголовный кодексини 165-чи статьясына тийишлиликде эки жылгъа тутулургъа боллукъдула. 

 «Россети Шимал Кавказ» хайырланылгъан электрокючню багъасын келир айны онунчусуна дери тёлерге кереклисин къайтарып эсгертеди. Анда айтханларыча, эсеплеген приборда шартланы да ай сайын 23-25 кюнледе алагъа сёлешип, билдирирге керекди.

Хайырланылгъан ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.