НИЕТ САУЛУКЪ – НАСЫПНЫ МУРДОРУДУ

«Саулукъ» деген сёзню биз не магъанада ангылайбыз? Бек биринчиден, кёз аллыбызгъа адамны къарыуу, тирилиги, ауруулагъа хорлатмагъан саны келедиле. Алай  адамны ич дуниясы тынчлыкълы болмаса, анга саулукълуду дерге жарамаз.

Ниет саулукъ – ол медицинада жюрюген термин болуп къалмай, сагъышларыбызны, акъылыбызны, жашаугъа къууана билгенибизни, къыйын болумлада жашаудан тюнгюлмей, тирнеклеп кюрешгенибизни ёлчемиди. Белгилисича, ич дуниясы сабыр болгъан адам  жашауда таукел атлайды, башхала бла келишимли жашайды. 

Биз барыбыз да бюгюнлюкде тутхучсуз дунияда жашайбыз. Кече-кюн телефонланы зынгырдагъанлары, дунияда болгъан тынгысызлыкъла тынчлыгъыбызны бузадыла. Заман асыры терк баргъанча кёрюнеди, жашауну юсюнден сагъыш этерге  жетмейди. Тынгысызлыкъ жашауубуздан кетмейди. Жашау алаймы барыргъа керекди деп сагъышланабыз.

Жашаууна ыразы болуп зауукъланнган керексиз излем тюйюлдю, адам улуну ич дуниясыны излемиди. Адамны кючлюлюгю, деменгилиги  битеу ишлени бирден тамамлауда тюйюлдю. Бирде жумушланы бир кесегин къоюп, кеси сагъышыбызны эшите, тергей, солуй, бюгюнню кертилигин багъалай билирге керекбиз.

Бирле, жюреклерине сабырлыкъ излей, спортха, искусствогъа, илмугъа, ишге берилип, тынгысызлыкъны хорларгъа кюрешедиле.

Дунияны саулай тюрлендирирге онг жокъду. Алай  дуниягъа, жашаугъа кёз къарамын тюрлендирир амал а барды. Адам жашауну сухулугъуна бюкдюрмей, кючю къарыгъанча излемин сакъласа, оюм дуниясы  саулукълу сакъланырыкъды.

Саулай дуния сабырлыкъ алып, хар зат да бир кюннге тап болуп къаллыкъды демеклик алдауду. Алай биз кесибиз анга къарамыбызны тюрлендиралсакъ, жашау нюрлю, зауукълу да бола барлыкъды. Ниет саулукъ сакълау бизни баш борчларыбыздан бириди. Адам кесини ич дуниясына, кючюне, къарыууна сакъ болургъа керекди. Ниет саулукъ – насыпны мурдоруду…