Жолла къоркъуусуз болурча

Къабарты-Малкъарда "Жашау этерге инфраструктура" миллет проектге кёре иги кесек жол жангыртылгъанды. Ол санда туристле хайырланнган маршрутла да къоркъуусуз болурча аслам эс бурулады. 

Анга кёре быйыл Зольск районда  Нарзанла талагъа бла Жылы суулагъа баргъан Малка - Ингушли жолну  8,7 километр тенгли бирине тынгылы ремонт этилгенди.   Мында тротуарла ишленнгендиле, эки къат асфальт жайылгъанды эм къоркъуусузлукъ жалчытылынырча мадар этилгенди.

Аны бла бирге бюгюнлюкде Экинчи Чегем-Булунгу жолну да жангыртып кюрешедиле. Аны туристле эм башхалагъа да магъанасы уллуду. Мында Чегем чучхурла, Бийик тау заповедник, «Флай Чегем» парк, Эл-Тюбюнде кешенеле, Къулийланы  Къайсынны ата юйю эм башха сейир жерле бардыла.

Ишле 2022 жылда башланнгандыла, аны кезиуюнде жолну 12,6 километри бла 5 кёпюр жангыртылгъанды эм 10 километрде чыракълы чыпынла тартылгъандыла. Буруннгу жылда чучхурланы тийресинде 2 километр чакълы бирде жолну мурдорун кючлеп, кенгертип кюрешгендиле. Быйылны юсюнден айтханда да, жолну 25 километр кесеги жангыртыллыкъды эм 9 кёпюр ишленирикди.

Бюгюнлюкде жолну мурдорун кючлеп бошап, биринчи къат асфальт салып башлагъандыла. Андан сора да, жарладан таш, топуракъ оюлмазча бетондан хунала къуюп кючлейдиле, жауун эм башха суулада саркъырча арыкъла жарашдырыладыла эм машинала тёнгеремезча  буруула тартыладыла. Проектге кёре,  жылны ахырына дери бир къат асфальт салып бошаргъа керекдиле. Саулай алып айтханда, объект келир жылдан кеч къалмай  хайырланыргъа берилирге керекди. 

- Къабарты-Малкъарны жоллары сыйдам эм къоркъуусуз бола барадыла. Чегем таргъа баргъан жолну юсюнден айтханда да иги кесек иш этилгенди. Ол санда жоллада тротуарла, солурча, тёгерек-башха къарарча майданла да къураладыла. Ол себепден къонакъла жолоучулукъдан эм мында кийик табийгъатдан да зауукълукъ алаллыкъдыла, - дейди туристледен  бири Анна Смирнова.

Быйыл жылны башындан бери Къабарты-Малкъарда  солургъа 900 минг адам келгенди. Аланы асламысы Элбрус тау лыжа курортда кечиннгендиле. Былтыр бу заман бла тенглешдиргенде ол 1,5 кереге кёпдю. 

Жол мюлкню игилендириу туристлени санына  къошулурча эм экономика да айнырча себеплик этеди. Жангы мардалагъа келишген жолла курортлагъа эм башха жерлеге да къоркъуусуз барырча онг бередиле.  Ол шарт  республиканы даражасын да кётюрюрча себеплик этеди.  

Эсге сала айтсакъ, "Къоркъуусуз эм тынгылы автомобиль жолла" миллет проект ишлеп башлагъанлы 2019 жылдан бери: Чегем чучхурлагъа, Тамбукан кёлге, Жылы суулагъа,Бызынгы тарына, «Янтарный» дарман суулагъа, Долинск курортха, эм башха жерлеге баргъан баргъан жолланы да жюз километрден асламы жангыртылгъанды.