Республикадан билдириуле

Хорламны паркы

Нальчикде Хорламны паркы ишлене турады. Бу кюнледе да анда къурулушчула тири къармашадыла, деп билдиргендиле КъМР-ни Къурулуш эмда ЖКХ министерствосундан.

Парк тёртге бёлюнюрюкдю: Жигитлени, Баш, Ара эмда Къошакъ аллеялагъа. Аланы бирлеринде плитка эмда бордюрла салыннгандыла, шинтикле эмда чыракъла орнатылгъандыла, башхаларында уа аллай ишле жууукъ кезиуде тамам этилликдиле. Аны бла парк проектде кёргюзтюлген сыфатын ала турады. Адамла уа, ол битгинчи окъуна, бу тапландырылгъан тийрени хайырланып башлагъандыла. Министерствода белгилегенлерича, ишле бары да «Тап шахар болум къурау» федерал проектни чеклеринде бардырыла турадыла.

Бадыражанланы тузлау

Республикада консервала чыгъарыучу алты предприятияда томатланы жарашдырыу тири барады, дегендиле КъМР-ни Эл мюлк министерствосунда.

Тийишли кезиу башланнганы бла бу заводла 35,6 миллион (условный) банка бадыражан паста чыгъаргъандыла. Аны ала уллу чыккырлагъа къуюп хазырлайдыла, ызы бла андан тюрлю-тюрлю соусла этедиле. Дагъыда 6,2 миллион банка тузланнган томатла жарашдыргъандыла. Продукцияны кеслерини неда башха компанияланы атлары бла чыгъарадыла. Сатхан а мында да этедиле, тыш регионлагъа да жибередиле. КъМР-ден продукциягъа кёп жерледе уллу тюкенледе, онлайн-сетьледе да тюберге боллукъду.

Элледе суу бла жалчытыу игиленирикди

Жууукъ кезиуледе Лашкутада бла Кёнделенде суу ызланы жангыртыу ишле башланырыкъдыла. Ала "Коммунал инфраструктураны айнытыу" федерал проектни чеклеринде бардырыллыкъдыла. Шёндю аланы бардырлыкъ подряд организацияла белгили болгъандыла, деп билдиргендиле КъМР-ни Къурулуш эмда ЖКХ министерствосундан.

Кёнделенде Ленин, Эней улу, Терешкова эмда Родниковая орамлада быргъыла (битеу да 2,5 километр) жангыртыллыкъдыла. Аны хайырындан таза суу бла 1180 адам жалчытылынырыкъды. Лашкутада уа къуюудан башлап, таза суу жыйылгъан чыккырлагъа дери созулгъан эски быргъыны (2,3 километр) орунуна жангысын саллыкъдыла. Этиллик ишни хайырын 170 адам кёрлюкдю.