Ахча жюрютюуню юсюнден толу ангылау болурча

Финанс окъуулулукъдан Битеуроссей зачёт (finzachet.ru) 7-28 октябрьде ётерикди. РФ-ни Ара Банкыны сайтында айтылгъаннга кёре, анга къатышханла кеслерини билимлерин терк сынап кёрюрге боллукъдула. Анда соруула жашауда тюбеген болумлагъа кёре жарашдырылгъандыла, хар кимге да ангылашынырча.

Тёреде болгъаныча,  зачёт эки тенгнге бёлюнеди: таматалагъа эмда сабий къауумгъа. Гитчеле финанс окъуулулукъну жорукълары бла оюн халда шагъырей боллукъдула, ахчаны тап жюрютюрге, жыяргъа да юйренирикдиле.

Таматала уа кеслерини бюджетлерин къыйматлы къураргъа, финанс продуктла сатып алгъанда аманлыкъчылагъа алданмазгъа, ойлап оноула этерге эмда пенсияларына къошакъ къыстырыкъ къалай жыяргъа боллугъуна тюшюнюрюкдюле. Гитче, уллу болса да, зачётха къатышырыкъ хар ким да кесин хыйлачылагъа алдатыргъа боллугъун билаллыкъды.

Орта эмда тамата классланы окъуучулары уа. 14-16 октябрьде бардырыллыкъ олимпиада зачётда  кеслерини кючлерин сынаргъа боллукъдула. Анга сорууланы Экономиканы бийик школуну (ВШЭ) келечилери хазырлагъандыла. Аны жетишимли ётгенлеге «Бийик сынам» Битеуроссей олимпиаданы «Финанс окъуулулукъ» профиль бла финалына терк окъуна чыгъаргъа онг берилликди. Анга къатышыу а ызы бла вузлагъа киргенде себеплик этеди.

Зачётну энчи неда юйюр къауумну санында ётерге боллукъду. Ахырында битеу къатышханла финансланы юсюнден билимлеринде кемчиликлени толтурургъа энчи рекомендацияла аллыкъдыла, жетишимли ётселе уа – сертификат къоллу боллукъдула.