Ток объектлеге - энчи сакълыкъ

«Россети Северный Кавказ» – «Каббалкэнерго» биригиу  электрокюч объектлени къатында бир тюрлю иш бардыргъанда  энчи сакълыкъ изленнгенин эм аны ючюн  биригиуден эркинлик алыргъа кереклисин    эсге салады.

Ол санда энчи техника ток баргъан ызлагъа (ЛЭП) заран салмазча эс бурургъа тийишлиди. Сёз ючюн, 4,5 метрде баргъан  ток чыбыкъны юзерге къоркъуу барды. Андан сора да,   юч метр теренликге къазгъанда, къурулуш бардыргъанда эм башха жумушланы тамамлагъанда да, авариягъа  келтирирге эм ёртенни къозгъаргъа боллукъду.

Сагъынылгъан жорукълагъа уллу кёллюлюк этиу бир хатагъа келтирмей къоймайды. Сёз ючюн, быйыл мартда   экскаватор жерни къазгъанда,  6 кВ ток чыбыкъны юзгенди эм Нальчикни жартысын  электрокючсюз къойгъанды.  Болсада  «Каббалкэнерго» биригиуню  келечилери къысха заманда  абонентле ток бла жалчытылынырча  мадар этгендиле.

Эсге сала айтсакъ, электрокюч бла жалчытхан объектле энчи сакъланнган жерлеге саналадыла. Законодательствогъа кёре, 110 кВ  -  20 ,  35 кВ – 15,  6-10 кВ – 10 эм  1 кВ чыбыкъгъа 2 метрден азгъа жууукълашыргъа жарамайды. Анга бузукълукъ этилсе, адамны жашаууна эм табийгъатха да заран жетерча уллу къоркъуу барды.