КъМР-ни Башчысы Абхазияны жамауатына мамырлыкъ, монглукъ тежегенди

Абхазия сыйлы байрамын – республиканы тарыхында жангы кезиуге жол ачхан Хорламны бла Жалынчакъсызлыкъны 32-жыллыгъын – белгилейди. Аны бла байламлы  Казбек Коков  Абхазияны Президенти Бадра Гунбаны бла республиканы саулай жамауатын жюрегинден къызыу алгъышлагъанды, деп билдириледи КъМР-ни Башчысыны телеграм-каналында.

Кесини алгъышлау сёзюнде Казбек Коков абхаз халкъ, жалынчакъсызлыгъын къоруулай, уллу жигитлик этгенин, жашауунда бек  къыйын сынауладан хорлам бла къутулгъанын энчи чертгенди. Бюгюнлюкде Абхазия, кесини тилин, маданиятын, ёмюрлени теренинден келген адет-тёрелерин тас этмей, алгъа таукел барады, деп белгилегенди.

КъМР-ни Башчысыны алгъышлау сёзюнде Къабарты-Малкъарны бла Абхазияны халкъларыны араларында къарындаш байламлыкълагъа энчи эс бурулгъанды. Ол заманнга, къыйын сынаулагъа да къарамай, кючлене баргъаны чертилгенди. 
Казбек Коков Абхазияны жамауатына мамырлыкъ, ырахатлыкъ, монглукъ тежегенди, республика мындан ары да жашнай, айный барырын сюйгенин билдиргенди.