Жалынчакъсызлыкъны эм биригиулюкню кюню бла алгъышлагъанды

  КъМР-ни Башчысы Казбек Коков Россейге тёрт жангы регион къошулгъан кюн бла байламлы кесини телеграм-каналында алгъышлау этгенди. 

«Хурметли жерлешлерим! Бюгюн бизни къыралда Донецк халкъ республика, Луганск халкъ республика, Запорожье эм Херсон областьла Россей Федерациягъа къошулгъан кюнлерин белгилейдиле. 2022 жылда 30 сентябрьде башда сагъынылгъан регионлада тургъанла алгъын жашагъан Ата журтларына къошулгъандыла.

 Ол жумуш бошдан этилмеген эди, регионла юйлерине къайтхан эдиле-тарых жаны бла тюзлюк да тохташдырылгъанды.

Кёп ёмюрледен бери Донбассда бла Новороссияда жашагъанла Россей бла байламлыдыла, тарых жаны бла бирликлери къатыды, ана тиллери эм орус маданият не заманда да ала бла бирге болгъанды.  Бу регионлада тургъанла кёп жылланы ичинде жалынчакъсызлыкъ, азатлыкъ излеп къыйын эм жигит жолланы ётгендиле. Ала кеслерини ана тиллеринде сёлеширге, ёмюрледен келген маданиятларын сюерге эм адет-тёрелерин жюрютюрге, кеслерини жигитлерин унутмай турургъа, башха адамлача жашаргъа эм ишлерге, къоркъуусузлукъда сабийле ёсдюрюрге итинедиле.

Тарыхлы Ата журтлары бла бирге къошулуу бизни аскерчилерибизни-уллу къыралны битеу регионларындан энчи аскер операциягъа къатышханланы  кишиликлерини, къатылыкъларыны эм жигитликлерини хайырындан болгъанды.

 Ийнанама, шуёх эмда кёп миллетли россейли халкъланы ичинде Донецк халкъ республика, Луганск халкъ республика, Запорожье эм Херсон областьла айныуну эм монглукъну жолуна къайтырыкъларына.

Жюрегими теренинден къарындаш регионаланы байрамлары бла алгъышлайма, алагъа огъурлулукъ тежейме, сабийлери къоркъуусузлу жашарча, битеу этген умутлары толуп, билим да алып, бизни уллу къыралыбызда ишлерча эм жашарча онг болсун, деп айтылады республиканы оноучусуну алгъышлау сёзюнде.