Бек башы - биригиулюк эмда бир бирни ангылау

Нальчикде КъМР-ни Маданият фонду миллетлени, тиллени, ахшы адет-ёрелени сакълау жаны бла кёп тюрлю-тюрлю ишлени дайым да бардырады. Бу кюнледе да анда сейирлик тюбешиу болгъанды. Ол Дагъыстанда жашагъан миллетлени биригиулюклерине эмда Россейни халкъларыны ана тиллерини кюнлерине жораланнганды. Бу ишни къурагъанла республиканы Маданият фонду (председатели Люаза Макоева) эмда «Дагестан» миллет-культура ара (башчысы Ибрагим-Халил Сурхайхановдула). Алагъа уллу себепликни КъМР-де Дагъыстан Республиканы толу эркинликли келечиси Магомед-Расул Магомедов да этгенди.

Бу биринчи кере бардырылгъан аламат башламчылыкъгъа КъМР-де миллетлени ишлери жаны бла министерство, аны бёлюмюню башчысы Рахайланы Мурат, республикада жашагъан бу жерли миллетлени келечилери: Халкъла аралы черкес ассоциацияны председатели Хаути Сохроков, малкъар халкъны «Алан» жамауат организациясыны башчысы Жаболаны Жабраил, республикада болгъан миллет-культура жамауат организацияланы, араланы башчылары къатышхандыла. Аланы араларында: месхетли тюрклюлени «Ватан» (Ильяз Пашалиев), «Россейде эрменлилени союзуну КъМР-де бёлюмюню (Артур Погосян), азарбайджанлыланы «Азери» (Али Дадашев), Къабарты-Малкъарда «Бирлик ючюн «Сябры» (Павел Седорук), гюржюлюлени «Риони» (Сергей Кавлашвили), татарлыланы «Туган Телны» (Исмаил Маманов), украинлыланы «Днипро» (Светлана Харенко),  эстонлуланы «Кодумаа» (Марет Романи), оруслуланы «Насыпны чыпчыгъы» (Наталья Бойко) эмда башха миллет араланы башчылары  къатышхандыла, бу огъурлду ишни дурус кёргендиле.

Тюбешиуню кезиуюнде Хаути Сохроков чертгеннге кёре, Шимал Кавказда бардырылгъан быллай башламчылыкъланы юсюнден федерал магъанада айтадыла. Ала керти да халкъланы, миллетлени, динлени араларында къарындаш байламлыкъны, бир бирни ангылаулукъну шартыдыла эмда къаллай магъаналы ишлени да биригип бардырыргъа себеплик этедиле. Биригиулюк болгъан жерде уа не заманда да келишиулюк, бир бирни ангылаулукъ да боладыла. Быллай тюбешиуле регионну халкълары россейли къыраллыкъны ышаннгылы таянчагъы болгъаныны шартыдыла эмда инсанлыкъ, жамауат биригиулюкню кючлендириуге элтген тюз жолду.

Жаболаны Жабраил а бусагъатдагъы жашауда быллай ишлени дайым да терк-терк бардыра турургъа кереклисин чертгенди. «Нек дегенде ала халкъла аралы байламлыкъланы бютюн къаты кючлендирген ишледиле».

Дагъыда тюбешиуню кезиуюнде Дагъыстанны халкъларыны биригиулерини кюню кёп миллетлени араларында биригиулюкню деменгилилигин кёргюзтгенин, ол жаланда ич байрам болуу бла чекленип къалмай, битеу Шимал Кавказны халкъларына да тарых магъаналы юлгюдю дегендиле, тюбешиуге къатышханла. Кабарты-Малкъарда болгъан къыркъгъа жууукъ миллет культура араланы бирикдирген шуёхлукъну бу юйюнде, хар миллетни да энчилигин сакълай, граждан къурулушну бардырыр онг болгъанын да чертгендиле ала.