Адет-тёрелерибиз сакъланыр ючюн къайгъыра

Республикалы Маданият фондда «Тёрелени сакълай, келир заманны мурдорун къурайбыз» деген ат бла тёгерек стол болгъанды. Аны ишине миллет-маданият араланы эмда жамауат биригиулени келечилери къатышхандыла. Ала кёп миллетли бир юйюбюз  Къабарты-Малкъарда ахшы адетлени бла тёрелени, ана тиллени келир тёлюлеге сакълауну амалларын сюзгендиле, кеслерини оюмларын туура этгендиле.

Малкъар халкъны «Алан» жамауат биригиуюню башчысы Жаболаны Жабраил акъыл этгенден, ана тилге, адет-тёрелеге да юйретиу юйюрде башланыргъа керекди. «Сабий туугъан кюнден окъуна деп, таукел айтыргъа боллукъма. Бусагъатда узакъ тау элледе окъуна ана тилинде сёлешгенни хазна эшитмезсе. Жарсыугъа, кесини оюмун ана тилинде ангылатхан адамгъа тюбеген да бек къыйынды»,- деп къошханды.

Тамата тойларыбызны юслеринден да сагъынмай болмагъанды. Тойлада бизни эрттеден келген адет-тёрелерибиз этилмегенлери жарсытады аны. «Сёз ючюн, мен келинни бла киеуню тёрге чыгъарып олтуртханларын дурус кёрмейме. Эллиле бла сёлеше келсенг, анга ыразы болгъанла хазна жокъдула»,- дегенди.

Ана тилле, бурун заманладан къала келген ахшы адет-тёреле тас бола баргъанларына МЧА-ны председателини болушлукъчусу, толтуруучу директору Лера Нанова да жарсыгъанды. «Газетлерибизде алагъа кёбюрек эс бурулса, радио, телевидение бла да терк-терк айтыла турса, китапла да чыгъарылсала, иги боллукъ сунама», - дегенди.

Кеслерини оюмларын башхала да айтхандыла. Маданият фондну таматасы Люаза Макоева уа миллет адет-тёреле, ана тилле бла байламлы тюбешиулени, башха жыйылыуланы да не къадар кёп бардырыргъа, алагъа элледен эсли адамланы, жазыучуланы, журналистлени, артистлени, жамауат организацияланы, маданият араланы башчыларын, бютюнда бег а жаш тёлюню бла сабийлени чакъыра турургъа кереклисин чертгенди, фондда ол ишни тирилтирге хазырлыгъын да билдиргенди.

Жыйылгъанланы кёллерин кётюрюрча концерт программа да хазырланнганды.

Тюбешиуге келгенле дагъыда къолдан уста Ирина Игнатованы «Патчах къызы» деген ишлеринден къуралгъан кёрмючге бек бюсюрегендиле. Анда автор «Орус фольклордан гинжилени» къауумун кёргюзтгенди.
Ахырында Люаза Макоева «тёгерек столну» ишине къатышханланы барысына да жюрек ыразылыгъын билдиргенди. 

 

Холаланы Марзият.
Поделиться: