Хунерли студентлени урунургъа чакъырадыла

Студентлеге къуралгъан «Мен - устама» Битеуроссей олимпиаданы тогъузунчу кезиуюне къатышыргъа сюйгенлени эсепге алыу барады шёндю. Къабарты-Малкъарда вузлада окъугъанла ары заявкаларын берип, урунуу рынокга чыгъаргъа хазырланыргъа боллукъдула. Бу проект РФ-ни Илму эмда бийик билим бериу министерствосуну болушлукълары бла бардырылады.

Олимпиада хунерли студентлени бирикдиреди, усталыкъны байлыкъ этеди. Былтыр анга бизни республикадан 208 окъуучу къатышхан эди. Аладан экиси уа дипломла къоллу болгъандыла.

Аны быйылгъы кезиуюнде кёп бёлюмлеге жетерикдиле: география бла дизайндан башлап, ядерный физикагъа эмда жалгъан интеллектге дери. Ары къатышханланы промышленность эмда академия туризм жумушла сакълайдыла. Жаш адамла авиация заводлагъа, атом станциялагъа, тау-байыкъландырыучу комбинатлагъа барыргъа, илму араланы эмда лабораторияланы ишлери бла шагъырейленирге, «Мен - устама» миллет кадрла резервге кирип, иш бла жалчытыучуланы вакансияларын хайырланыргъа боллукъдула.

«Къабарты-Малкъарны жаш тёлюсю бу олимпиадагъа эмда ол берген онглагъа жылдан-жылгъа бютюнда уллу эс бурады. Быйылгъы кезиу алагъа урунуу жолларыны ал такъыйкъасы боллугъуна ишексизме», - дегенди «Сенеж» мастерскойну ректору Андрей Бетин.

Бу олимпиадагъа былтыр бизни республикадан къатышхан студентле «Къырал эмда муниципал оноу этиу», «Биология», «Экология» сфералагъа энчи эс бургъандыла. «Быйыл а аланы 70 бёлюм сакълайды, ол санда беш жангысы – «Халкъла аралы байламлыкъла», «Инклюзияны психологиясы», «Жашил металлургия», «Цифралы бизнесде продукт менеджмент» эмда «Россейни Арктикасы – усталаны тийреси». Олимпиада бу эм магъаналы сфералагъа тийишли хунерли кадрланы ачыкъларгъа себеплик этерикди», – деп къошханды «Мен - устама» Битеуроссей олимпиаданы таматасы Валерия Касамара.

Регистрация (https://yandex.ru/profi/registration/info) быйыл онбешинчи ноябрьге дери барлыкъды. Ызы бла 14 ноябрьден башлап, 1 декабрьге дери айырыу кезиу ётерикди, келир жылда февраль-апрель айлада уа финал боллукъду – аны эсеплерин июньда туура этерикдиле.