Къырал берген болушлукъну хайыры уллуду

Россейни Экономиканы айнытыу министерствосу эмда МСП Корпорация бирге бардыргъан (льгота кредитле бла жалчытхан) программаны чеклеринде былтыр гитче технологиялы компанияла (МТК) кёп къалмай 265 миллиард сом багъасына болушлукъ алгъандыла. Аны хайырын кёрген бир биригиу, орта эсеп бла алып тергегенде, 926,2 миллион сом къоллу болгъанды. Сёз ючюн, 2021 жылда ол андан къайда аз эди – 337 миллион сом, деп билдиргендиле КъМР-ни Экономиканы айнытыу министерствосундан.

МСП Корпорация бардыргъан тинтиуле ачыкъ кёргюзтгендиле: гитче эмда орта бизнес бла тенглешдиргенде, сагъынылгъан технологиялы компанияла тирирек айный барадыла. Юлгюге: РФ-ни Экономиканы айнытыу министерствосуну реестрине кирген МТК-лада уруннганланы саны, 2021 жылда болум бла тенглешдиргенде, 39 процентге кёбейгенди. Ала бу кезиуде 50 минг жангы ишчи жер (бир компанияда - тогъузун) къурагъандыла. Гитче эмда орта предпринимательство бёлюмде уа аланы саны 748 мингден артыкъ болгъанлыкъгъа, хар субъект санына алып тергегенде уа, ишчилени саны юч процентге азайгъанды.

Сагъынылгъан реестрде Къабарты-Малкъар Республикадан эки технологиялы компания барды. Буруннгу жыл ала 850 миллион, былтыр а 2,4 миллиарддан аслам сом ишлегендиле. Алада 2023 жылда - 60, озгъан жылда уа 150 адам уруна эди.

Башында айтылгъан программагъа къатышып къыралдан ахча алгъанла бютюнда иги айнытыу кёргюзтедиле. Озгъан жылны ахырына алып къарагъанда, аллай болушлукъ 286 компаниягъа берилгенди. Ала 2021 жылдан башлап былтыргъа дери 6,8 минг жангы ишчи жерле къурагъандыла. Башхача айтханда, бир компаниягъа аладан 24-сю жетеди. Ол а саулай МТК бёлюмде кёрюмдюден 2,5 кереге уллуду.

Энтта да 59 компания уа бу программаны чеклеринде быйыл да ахча алгъандыла. Ол бардырылып башланнган кезиуде битеу да 56,7 миллиард сом багъасына келишимле этилгендиле.

«Гитче технологиялы компанияла айнып, стартап кезиулеринден чыкъгъандыла. Тюшюрген файдалары, тёлеген налоглары да ёсе баргъаны, ала къыралны экономикасына иги къошумчулукъ этгенлерин кёргюзтеди, ишчи жерлерини саны кёбейгени уа бийик квалификациялары болгъан кадрланы ала таба тартады. Учуз кредитле «умутдан башлап, рынокга чыгъыугъа дери» кезиуню иги да къысхартадыла», - дегенди МСП Корпорацияны башчысы Александр Исаевич.

Быллай кредитле алгъанланы 44 проценти тюрлю-тюрлю производствола бла кюрешедиле, 19 проценти уа илму-тинтиу ишлени бардырадыла. Машинала къурау бёлюмде да аланы онбир проценти къармашадыла.