Университетге алыу бошалгъанды

Къабарты-Малкъар къырал университетде 2025 жылда жаш тёлюню окъуугъа алыу бошалгъанды. Саулай да 4930 студент алыннганды, аланы санында уа 753-сю тыш къыралладан келген жашла бла къызладыла.

Къабарты-Малкъарда жашагъан жаш тёлюден сора да, бери РФ-ни 37 регионундан келгендиле жаш адамла. Быйыл КъМКъУ-гъа дунияны 16 къыралындан киргендиле студентле. Аланы арасында эм кёп адам Туркменистандан келгенди, ала 405 жаш бла къыз боладыла. Индиядан а бу жол бизни окъуу юйюбюзге 290 адам киргенди. Египетден оноулан бардыла, Палестинадан да – тёртеулен. Энди быйыл биринчи кере Бурундиден бла Сьерра-Леонеден да келгендиле окъургъа.

2025 жылны окъуугъа алыу кампаниясыны эсеплери ачыкълагъаннга кёре, быйыл алыннган студентлени арасында ЕГЭ-леде бийик балла алгъан 132 адам барды. Былтыр бла тенглешдиргенде уа, ол кёрюмдю 17 студентге асламды.

Бир къырал сынаулада орта эсеп бла тергелген балл да 68, 83-ге дери кётюрюлгенди. Аны алайлыгъы уа ахшы шартды, нек дегенде КъМР-де мектеплени быйыл бошагъанланы ЕГЭ-леде, орта эсеп бла тергегенде, баллары озгъан жылдан эсе тогъуз баллгъа алаша болгъанды. Целевой амал бла специалитетге – 68, ординатурагъа уа 48 адам алыннганды.

Андан сора да, быйыл КъМКъУ-гъа окъуугъа алгъан кампания медицина ызда усталыкълагъа сурам уллу болгъанлай къалгъанын дагъыда бир кере ачыкълагъанды. Бу бёлюмде бир бюджет жерге – 25, тёлеп окъугъан жерге уа 11 адам болгъанды.

Дагъыда сурам IT-ызлагъа уллу эди. Мында уа бюджетде бир жерге – 18, контракт бла уа 24 адам бар эди. Экономика ызлагъа да кирирге сюйгенле кёп болгъандыла. Бу усталыкълагъа уа хакъсыз окъулгъан бир жерге – 54, тёлеп билим алыргъа уа 11 жаш бла къыз болгъандыла.

Арт кезиуде кёре келгенибизча, жаш тёлю юристге окъургъа да аслам халда барады. Алайды да, быйыл да бу жаны бла усталыкъ алыргъа сюйгенле аз тюйюл эдиле. Бу бёлюмде бюджетни бир жерине 62 адам болгъан эсе, тёлеп окъургъа уа аланы саны оннга жетгенди.

Устаз усталыкъланы сайлагъанла быйыл асламыракъ болгъанларын да белгилерчады. Мында уа хакъ тёлемей эмда контракт бла окъутурукъ бёлюмлени экисинде да бирер жерге алтышар адам болгъанды. 

Быйыл КъМКъУ-гъа, андан сора да, Башкъортостандан, Брянск, Калининград, Оренбург эмда Сахалин, бирси областьладан, Севастопольдан, Донецк Халкъ Республикадан, эндиге дери келмеген аслам башха жерледен да киргендиле окъургъа жаш адамла. Алай бла 2025 жылда университетге студентлени алгъан кампания бу жол сынауладан бийик баллагъа тийишли болгъанланы саны кёбейгенин эмда быйылгъа дери КъМКъУ-гъа адамлары кирмеген жерледен жашла бла къызла келгенлерин белгилегенди.