Жарыкъ, тири, аракъысыз жашауну сайлагъыз!

11 сентябрьде Россейде Ичгичиликге къажау кюн белгиленеди. Ол тохташдырылгъанлы ёмюрден да артыкъ заман озгъанды. Бу кюнде аракъы адамны саулугъуна салгъан хатаны ангылатыугъа, жаш тёлюню бу къужур ишден сакълаугъа бурулгъан мадарла бардырыладыла. Биз да къысха статьяда ёсюп келген тёлюге саулукълу жашау бардырыргъа чакъырыу этерге сюебиз.

- Алгъын бизге аракъысыз солуу толу тюйюлдю, ичгисиз къууанчы жарыкъ болмайды, деген терс ниетлени сингдирирге кюрешгендиле. Алай заман тюрленнгенди. Бюгюнлюкде   керти эркинлик адамны башын хайран этген затланы, аракъыны, наркотиклени  ичмесенг сезилгенин ангылагъанды халкъ. Аракъыны орунун таза акъыл, спорт, саулукъ, ариулукъ алгъандыла, -дейди врач психиатр-нарколог, КъМР-ни Саулукъ сакълау министерствосуну Психиатрияны бла наркологияны республикалы клиникасыны баш врачыны орунбасары Резуан Бетуганов.

Адам къолуна алгъан  хар стакан да аны артха элтеди, муратларын унутдурады, жашлыгъын, ариулугъун тас этеди, деп эсгертеди нарколог. 

- Аракъы эм багъалы затны – саулукъну – жокъ этеди. Ол къаллай ауруула къозгъагъаныны юсюнден кёп айтылады. Алай санларын бузгъан бла бирге  аны жамауатдан айырады. Ичген адамны жууукълары, танышлары, нёгерлери жокъдула. Аны жаш адамларыбыз ангылап, жашауларында керти да магъаналы затланы сайларгъа чакъырама – спортну, билимни, илмуну, маданиятны, китапланы, айныугъа элтген башха затланы, - дейди Резуан Бетуганов.

Аракъыгъа, наркотиклеге угъай деялгъан жашаууну иесиди, оноуланы кеси чыгъарады. Аны себепли жарыкъ, тири, аракъысыз жашауну сайлагъыз!