УФСБ: Документле бар, жол а жокъ

Россейни ФСБ-сыны КъМР-де Управлениясыны къуллукъчулары экономикада аманлыкълагъа къажау излеу-тинтиу жумушла бардыргъан кезиуде   «Регионда жол-къурулуш компания Бетон Групп» обществону башчысы А.Р. Караханянны бузукъчу ишин тыйгъандыла. Ол бюджет ахчаны кёп ёлчемде урлагъанына  ишеклик барды. Ахча «Къоркъуусуз эм качестволу жолла» миллет проектни жашауда бардырыргъа бёлюннген эди.

УФСБ-ны пресс-службасындан бизге билдиргенлерича, компанияны башчысы Зольск районда жолну тынгылы жангыртханыны юсюнден жалгъан документле хазырлагъанды. Алай бла къыралгъа 7,8 миллион сом къоранч этилгенди.

Зольск районну сюдю А.Р.Караханян РФ-ни УК-сыны 159-чу статьясыны 4-чю кесегине бузукълукъ этгенин тохташдыргъанды эмда аны эркинлигин 3 жылгъа сыйырыргъа деген оноуну чыгъаргъанды (ол условно халда толтуруллукъду). «Сюдню оноуу кючюне киргенди. Инсан кесин къалай жюрютгени 2 жылны бла 6 айны ичинде тинтилгенлей турлукъду», -дегендиле бизге кюч ведомствода.