Сизни атыгъыз бла жашыртын ахча алыннган эсе

Биреуню паспортуна ие болгъанлай неда хыйла бла анда жазылгъан данныйлени билгенлей, аманлыкъчыла аны атлары бла кеслерине кредитле алыргъа боллукъдула. Экспертле белгилегенлерича, инсанны документлерин хайырланыу бла кредитле алыу кёп жылланы ичинде эм кёп тюбеген аманлыкъ ишледен бири болгъанлай къалады. Жарсыугъа, инсанлагъа берилген кредитлени неда займланы эсеплеген бир система жокъду. Болсада, сизни атыгъыз бла ахча алыннганын кредит болумугъузну сурап билирге онг барды. Анда сиз кесигиз неда сизни атыгъыз бла къачан эм къаллай бир ахча алыннганы кёргюзтюллюкдю. Бу жумушну быллай операцияланы бардырыргъа эркинликлери болгъан алты бюрону юсю бла тамамларгъа жарарыкъды, аланы тизмелери Ара банкны сайтында берилипдиле.  

Кредит болумугъузда кесигиз алмагъан ахча борчланы кёрсегиз, аланы берген кредит организациялагъа барып, келишимлени кёргюзтюрлерин излегиз, деп юйретеди юрист. Хыйлачылыкъ этилгени тохташдырылса, полицияда аны юсюнден заявление жазыгъыз. Анда тинтиуле бардырыллыкъдыла, аманлыкъчыла жууапха тартыллыкъдыла. Аны бла бирге юрист адамланы энчи данныйлерин къоруулаугъа эс бурургъа чакъырады. Ол мурат бла паспортугъузну копиясын танымагъан адамлагъа бермегиз, банк сервиследе бла энчи аккаунтларыгъызда парольланы уа дайым алышындыргъанлай туругъуз. Керек болса, кредитование болумла эм хайырланыучуланы эркинликлерин къоруулау бла кюрешген юристден болушлукъ излерге жарарыкъды. Ол битеу керекли документлени жыйышдырыргъа болушурукъду эм сюдде сизни эркинликлеригизни къорууларыкъды.

Кёп затланы инсанла къырал жумушланы порталыны юсю бла билирге боллукъдула, анда кредит болумланы бюроларына алагъа кредитле неда займла берилмезча заявленияла жазаргъа эркин боллукъдула, бу жумуш ючюн хакъ алынырыкъ тюйюлдю. Бу жумушну МФЦ-лада да тамамларгъа боллукъду. Жангычылыкълагъа кёре, кредит организацияла ахчаны борчха бергенде инсандан быллай заявление келгенин бла къалгъанын тинтирикдиле, аллай тилек бек аздан 30 кюн алгъа этилген эсе, ахчаны берлик тюйюлдюле эм экинчи ишчи кюн оноуларыны эм аны сылтаууну юсюнден билдирликдиле.