Симфонияны Нальчикде эшитирикбиз

Россейни Композиторларыны союзуну келечиси Малкъондуланы Ахмат музыканы сюйгенлеге аламат саугъа хазырлагъанды. Кесини ТГ-каналында билдиргеннге кёре, «Ива» деген симфонияны энди Нальчикде да эшитир онгубуз боллукъду. 

Композитор айтханнга кёре, бу жумушну жашауда бардырыргъа анга Марийинский театрны Шимал Осетия-Аланиядагъы бёлюмю болушурукъду. 

- Кертисин айтханда, премьера болгъан кюн мен кесим окъуна бир сейир халда эдим. Хар зат да жомакъдача болуп. Аны себепли, ол такъыйкъаланы жангыдан жашаргъа, сезерге кереклисине тюшюнюп, «Иваны» Къабарты-Малкъарда да эшитирге сюеме.

Хау, ол концертни видеосу кёргюзтюлгенди алгъаракъда, жетмеймиди дерикле да чыгъарла, алай оркестр сокъгъан бла видеода тынгылау ол башхады, ийнаныгъыз. Мени башламчылыгъымы тюзге санагъанла билеклик этип, бу айны ахырында - 29 сентябрьде - сизге деп аламат маданият байрам къурарыкъбыз, - деп билдиргенди Малкъонду улу.  

Бу жол «Иваны» оркестр Шимал Осетия-Алания Республиканы сыйлы артисти Заурбек Гугкаев дирижёрлукъ этип согъарыкъды.  
Концерт Музыка театрда 19:00 сагъатда башланырыкъды.