Излемлеге сакъ болургъа керекди

Россельхознадзорну Шимал Кавказда Управлениясы карантиннге тийишли продукцияны эмда мирзеуню ташыуда бузукълукъ этмезге чакъырады.

Бу эсгертиу эл мюлк товарла чыгъарыучулагъа, сагъынылгъан продукцияны ташыучулагъа эмда аграр рынокда уруннган башхалагъа этиледи. Ала битимлени карантини эмда мирзеуню къоркъуусузлугъу эм таплыгъы жаны бла къырал излемлени  тынгылы бла толтурургъа борчлудула.

Ведомство аны къайтарып нек этеди: аны келечилери «Зерно» эмда «Аргус-Фито» къырал информация системаланы тинтген кезиуледе карантиннге тийишли продукцияны Къабарты-Малкъардан тышына ташыуда бузукълукъла этилип тургъанын кёрюп туруучудула. Сёз ючюн, мирзеуню фитосанитария эмда талай башха къагъытланы жарашдырмай ташыгъан шартла тохташдырылгъандыла.

Надзор органны тинтиулерине кёре, Къабарты-Малкъарда 557 карантин тийре барды; битеу да ол заранлы затла бла байламлы. Аллай жерледен продукцияны ташыгъанда, тийишли жорукъланы сансыз этиу заранлы затланы саулай къыралны тийресине чыгъарыргъа боллукъду. Ол а битеу эл мюлкге къоркъуулуду. Дагъыда быллай продукцияны тыш къыраллагъа ташыгъанда, аланы излемлерин толтурмагъаны ючюн, экспорт жаны бла онгла азайтыллыкъдыла, ол а къоранчлагъа келтирликди.

Управленияда айтханларыча, сагъынылгъан продукцияны фитосанитария документсиз ташыу – РФ-ни законодательствосуна тюзюнлей бузукълукъ этгеннге саналады. Аны этиу административ жууаплылыкъгъа келтирликди.

Бу ишде дагъыда товар бла бирге жиберилген документ (СДИЗ) барды. Аны мирзеуню элеваторгъа жыйгъанда, жарашдырыугъа жибергенде, Россей Федерациядан чыгъаргъанда эмда ары келтиргенде хазырларгъа керекди. Ол къагъыт мирзеу къайдан чыкъгъанын, къайры баргъанын, къалай ташылгъанын, къысхасы – аны жолун жик-жиги бла кёргюзтеди. Ансыз мирзеуню ташыугъа чек салынырыкъды.

Продукция жерине жетгенден сора уа бу документни «Зерно» системада жабадыла. Быллай продукция алгъан биригиу неда инсан, ол келгенден сора бир кюнню ичинде аны юсюнден Россельхознадзоргъа билдирирге борчлуду. Аны магъанасы контрольну заманында этиудю эмда карантин объектле жайылырына сакъ болууду. Бу жумушну сансыз этгенлеге да ведомствону атындан эсгертиуле жибериледиле.