Маллагъа дарман салыу мюлкню зарандан сакълар

Къабарты-Малкъарны ветеринария службасыны баш борчу – республиканы тийресин мал аурууладан къоруулауду, аланы жайылыуларына чек салыуду эмда малчылыкъ продукцияны качествосуна контроль этиудю. Аны тийишлисича тамамлауда маллагъа дарман салыу энчи магъананы тутады. Ансыз бруцеллёз, лейкоз, талау, къутургъан, ёлет дегенча аллай къоркъуулу ауруула адамлагъа да жугъаргъа боллукъдула. Сёз ючюн, талай жыл мындан алгъа Якутияда талау жайылгъаны кёплени эслериндеди. Бизни республикада уа нодуляр дерматит къаллай бир хата салгъанды.

Республиканы тийресинде маллагъа вакцинация этилип тургъаныны хайырындан быллай аурууланы кёплерин хорларгъа къолдан келеди. Алай ала арталлыда къуругъандыла дерге уа жарамайды; быллай затланы жайыучу къурт-къумурсхала, чибинле бир жары да кетмегендиле. Аны себепли кезиуюнде дарман салыуну магъанасы бек уллуду, дейдиле специалистле.

Маллагъа, адамлагъа да бек къоркъуулу болгъан аурууладан сакъланыр умутда республиканы къырал ветеринария службасы вакцинацияны кезиу-кезиу бардыра туруучуду. Алай, жарсыугъа, быллай профилактика жумушланы сансыз этгенле да табылыучудула. Малчылыкъ бла кюрешген организациялада бу жаны бла тыйгъыч хазна жокъ эсе, иели маллагъа уа вакцина салгъан неда башха ветеринар жумушланы тамамлагъан бир-бирледе бек къыйын болады. Бирле уа быллай иш бла келген ветеринар врачланы арбазларына окъуна жибермей тохтайдыла. Алай ангыларгъа керекди: маллагъа вакцинация бошуна этилмейди, аны ючюн иш бла келген специалистлеге да бу жаны бла болушлукъ этерге тийишлиди.

Къабарты-Малкъарда адамланы асламысы эл тийреледе жашагъанларын, кеслери да кёбюсюнде малла, юй къанатлыла тутханларын эсге алсакъ, заманында этилген ветеринар профилактика кёп хатадан сакълагъанын белгилерге тийишлиди.