Симфония музыканы сюйгенлеге къыйматлы саугъа

Бюгюн Къабарты-Малкъарда «Темиркановские вечера» деген тёрели фестиваль кесини ишин башлайды. Тёрт кюнню ичинде ол Нальчикни маданият жашауун байыкъдырлыкъды. Алай бла бюгюн 19 сагъатда эм 26 августда 400-жыллыкъны майданында Юрий Хатуевич башчылыкъ этип тургъан оркестрни концертлери уллу экранда кёргюзтюллюкдюле.

Ызы бла  27-28 августда Музыка театрда 19 сагъатда Санкт-Петербургну Д.Д.Шостакович атлы филармониясыны Юрий Темирканов 35 жыл башчылыкъ этип тургъан Россейни сыйлы коллективи - Академиялы симфония оркестрини концертлери ётерикдиле. 

27 августда оркестр дуниягъа атлары айтылгъан композиторланы чыгъармаларын согъарыкъды. Дирижёрлукъну Алексей Ньяга эмда бизни жерлешибиз Азамат Лакунов этерикдиле.

28 августда уа оркестрни программасында Пётр Чайковскийни бла Сергей Прокофьевни симфония концертлери согъуллукъдула. Экинчи кюннгю концертни дирижёру Россейни халкъ артисти Николай Алексеев боллукъду. Виолончельде халкъла аралы эришиулени лауреаты Дмитрий Хрычев согъарыкъды.

  Дагъыда фестивальны чеклеринде айтхылыкъ дирижёрну жашау эм чыгъармачылыкъ жолларына аталгъан кёрмючле да бардырыллыкъдыла, деп билдиредиле КъМР-ни Маданият министерствосундан.