Къоркъуусузлукъ сакъланырча

Росгвардияны къуллукъчулары жангы окъуу жылны аллында школлада къоркъуусузлукъ къалай жалчытылыннганын тинтгендиле.

Ведомстводан бизге билдиргенлерича, жер-жерли власть органланы келечилери эм  право низамны сакълаучула бла бирге школлада эм сабий садла терроризмге къажау мадарла къалай толтурулгъанларына къаралгъанды.  25 июльдан 15 августха дери кезиуде ведомствола аралы комиссия 400-ден аслам учрежденияда болгъандыла.

Тинтиулени кезиуюнде билим бериу учреждениялагъа кирген жерле къалай сакъланнганлары, ала техника керекле бла жалчытылыннганлары, терезеле, эшикле не халда  болгъанлары сюзюлгенди. Энчи эс мекямланы тийресинде буруулагъа,  видеокамералагъа, къоркъуулу болумну юсюнден билдирген аппаратлагъа бурулгъанды. Дагъыда от тюшюуге къажау мадарла къалай толтурулгъанлары да тинтилгенди. Билим бериу учреждениялада ишлегенле бла ангылатыу иш да бардырылгъанды.

- Быллай жумушла  сабийлени бла устазланы саулукъларына, жашауларына къоркъуу тюшмез ючюн толтуруладыла,-дегенди ведомстводан тышында къалауурланы управлениясыны таматасы полицияны полковниги   Юрий Меркулов.