Борчларын тёлерге ашыкъмагъанла кимледиле

Бюгюнлюкде Къабарты-Малкъарда  «Россети Северный  Кавказ»  компаниягъа  ток ючюн кёп заманны тёлемей тургъанланы  бирлерине  жашау журт-коммунал мюлк предприятияла саналадыла.  Саулай алып айтханда,  бюгюнлюкде аланы 3,3 миллиард сом чакълы берликлери барды, деп билдириледи  электрокюч бла жалчытхан биригиуню пресс-службасындан.

Борчларыны  танг кесеги  былтырдан кёчюрюлгенди.  Сагъынылгъан кезиуде  ала тёлеулерини  жаланда 24  процентин жабалгъандыла. Анга кёре борчларына энтта да 499,6 миллион сом къошулгъанды. Ахчаны иги кесегин  неда 3,2 миллиард сомну суу  эм жылыу бла жалчытхан организацияла берирге керекдиле.

Бюгюнлюкде аслам борчлары болгъанлагъа:  «Нальчикский водоканал»,  «Нальчикские тепловые сети»,  «Чегемрайводоканал», «Водресурс», «Коммунсервис»,  «Водсервис Исламей»,  «Чистый район», «Терский водоканал» эм «Коммунальник» предприятияла саналадыла.
Ала социал магъаналы болгъанлары ючюн ток ыздан кесерге жарамайды. Анга кёре борчла жыл сайын тёленмей,  кёбейгенлей барады.

Аладан ахчаны толусунлай алырча уллу иш бардырылады эм законну чеклеринде жууапха тартырча мадар этиледи.

Сёз ючюн, быйыл «Каббалкэнерго» 697 миллион сом ёнкючню даулап  тюрлю-тюрлю сюд инстанциялагъа  2 354 иск бергенди.  Болсада энергетикле къырал таматаланы себеплиги бла эм законодательствону кючю бла толусунлай тёлеулени   алыр  умутлудула. 

Эсге сала айтсакъ, «Россети Северный Кавказ» биригиуден  билдиргенлерича, ток ючюн заманында этилген тёлеулени хайыры бла республиканы электрокюч бёлюмю ишин тынгылы бардырады, ол санда ток бла сылтаусуз жалчытырча эм аны качествосун ёсдюрюрча мадар этиледи.