Баш борч – жамауатны къоркъуусузлугъун жалчытыу

КъМР-де ич ишлени министри полицияны генерал-лейтенанты Вячеслав Крючков ведомствону коллегиясыны жыйылыуун бардыргъанды. Анда министерствону быйылны алты айында ишини эсеплери чыгъарылгъандыла.

Кенгеш башланырны аллында саугъалау болгъанды. Россей Федерацияны ич ишле органларына буюрулгъан борчланы толтурургъа себеплик этгенлери ючюн КъМР-ни Парламентини депутатыны болушлукъчусу Анжела Адыгеунова, Къабарты-Малкъар республикалы гинжи театрны директоруну къуллугъун толтургъан Людмила Гонтарь эмда «Радуга» республикалы сабий социал-реабилитация араны таматасы, полицияны отставкада полковниги Владимир Темботов  сыйлы грамотала эмда эсде къаллыкъ саугъала бла белгиленнгендиле.

Къуллукъ борчларын бет жарыкълы толтургъанлары, керек заманда терк мадар эте билгенлери эмда ишлеринде жетишимле болдургъанлары ючюн Россейни МВД-сыны Сыйлы грамотасы, РФ-ни ич ишлени министрини Ыспас къагъыты, «Бет жарыкълы къуллукъ этгени ючюн» эмда «Аскер биригиулюк ючюн» майдалла, Россейни МВД-сыны Информация технологияла, связь эмда информацияны къоруулау жаны бла департаментини таматасыны сыйлы грамотасы эмда ыспас къагъыты, Къабарты-Малкъар Республикада МВД-ны сыйлы грамотасы бла  министерствону эмда Россейни МВД-сыны жер-жерледе бёлюмлеринде къуллукъ этгенлени айырмалы къаууму саугъаланнганды.

  Россейни МВД-сыны «Нальчик» управлениясыны таматасы Геграланы Маратха уа Россей Федерацияны Къоруулау министерствосуну хауада къорууланыу аскерлени дивизионуну башчысыны атындан энчи ыспас этилгенди.

Саугъалаудан сора кенгеш башланнганды. КъМР-де МВД-ны бёлюмлерини оператив-къуллукъ ишлерини эсеплери бла жыйылгъанланы ведомствону штабыны таматасы ич къуллукъну полковниги Наталья Егорова шагъырей этгенди. Ол белгилегенича, озгъан кезиуде профилактика мадарланы хайырындан право бузукълукъла азайгъандыла. Ол санда информация-телекоммуникацияла технологияланы хайырланыу бла этилген аманлыкъланы ачыкълау игиленнгенди.

Ызы бла Вячеслав Крючков сёлешгенди. Ол кемчиликлени туура этгенди эмда ведомствону андан ары ишинде магъаналы борчланы белгилегенди.

- Къабарты-Малкъарда жашагъанланы бла аны къонакъларыны къоркъуусузлукъларын жалчытыу, жамауат ырахатлыкъ сакъланырча этиу  энчи составны баш борчу  болгъанлай къалады, - деп эсгертгенди министр.

Кенгешни экинчи кесегинде Россейни  МВД-сыны бёлюмлерини бла жер-жерледе органларыны башчылары билдириуле этгендиле.

Ахырында  жыйылыуда туура этилген шартлагъа эмда айтылгъан оюмлагъа кёре КъМР-де ич ишлени министри Вячеслав Крючков бёлюмлени башчыларына буйрукъла бергенди, деп билдиргендиле Къабарты-Малкъар Республикада МВД-ны пресс-службасындан.