Заманында ангылатыу кёп хатадан сакълайды

Кёп болмай РФ-ни МВД-сыны   Май районда бёлюмюнде экстремизмге эм башха аманлыкъчылыкъгъа къажау туруу жаны бла тюбешиу болгъанды. Анга  Майский шахарны администрациясыны башчысыны орнубасары  Магомед Бачаев, ич ишлени бёлюмюню таматасы, полицияны подполковниги   Константин Беляков, тюрк диаспораны таматасы  Мавлюд  Даврушев эм районну иймамы  Сейфула Мурадов къатышхандыла, деп билдиредиле КъМР-де МВД-ны пресс-службасындан.

Тюбешиуде жаш адамла  экстремизм эм башха бузукълукъ ишле бла байламлы аманлыкълагъа  къатышмазча профилактика халда ангылытыу иш  бардырыргъа кереклиси айтылгъанды.  
- Бюгюнлюкде Интернетни уллу, гитче да  аслам  адам хайырланады. Болсада социал сетьлене бир къауумунда ачыкъ  халда жамауаны  бир бирге  этерге излеген  информацияла басмаланадыла, деп билдиргенди жыйылыну ача Константин Беляков.

Жыйылыуда полицияны келечилери  инсанларыбызны аманлыкъчы ишлеге чакъыргъанлары бла байламлы юлгюле да келтиргендиле.

- Ала кёбюсюнде алгъаракълада  кеслерин  кибер хыйлачылагъа  алдатдыргъанла бла байламлыкъ табаргъа кюрешедиле.  Ахчаларын тас этип жунчургъа тюшгенле бир тюрлю мадар этилирине ийнанырча боладыла.  Аны себепли аманлыкъчыла ала къыйналмай биягъы  ахча къоллу  болурча онг тапдырыллыгъын айтып алдайдыла эм кеслерине къошадыла. Полициячыла айтханларыча, бир тюрлю хатагъа тюшгюнчю,   аллай кезиуде мычымай ич ишлени органларына билдирирге тийишлиди.

Ахырында жыйылгъанла  бирден жууукъ байламлыкъда ишлерге кереклисин да  чертгендиле.