Къайсы усталыкъ игиди?

Элбрус районну билим бериу махкемелери «Цифраны дерси» деген битеуроссей акцияны чеклеринде информатикадан дерсле бардыргъандыла. Программированиягъа бла цифралы амаллагъа юйретиуню амалларын а Россейни белгили интернет компаниялары жарашдыргъандыла. Ала, дунияда информация технологиялада не жангылыкъла болгъанларын билирге болушханларындан сора да, къайсы усталыкъ хайырлы болгъанын билирге да болушадыла.

Бу жолгъу дерс  уллу шартлагъа жораланнганды. Тырныауузну 5-чи номерли гимназиясыны окъуучулары, видеороликге къарап, теманы магъанасын ангылагъандыла, ызы бла уа тюрлю-тюрлю жыл сандагъы къауумлагъа юлешинип, онлайн-тренингни сорууларына жууапла бергендиле. Аланы кёбюсю заданияларын толтургъандыла эмда сертификатла алгъандыла.

Тырныауузну Отарланы Керим атлы 1-чи номерли лицейинде да дерс видеороликге къараудан башланнганды. Окъуучула «уллу шартла» не болгъанын, не затха кереклисин билгендиле, ол жаны бла жангы усталыкъла бла шагъырейленнгендиле.
Алаша классланы окъуучулары уа роботланы «сермешлерине» къатышхандыла. Ол да ким къаллай бир билгенин сынагъан оюнду. Таматаракъла уа, кеслерин видеоблогерле, интернет тюкенни администраторлары да болуп сынагъандыла, аслам сайланнган видеону бла товарланы айырыр ючюн, интернет тюкеннге ненча адам киргенин эмда ненчасы сатыу этгенин тергегендиле. Талай соруугъа жууапла бергенден сора, алагъа къайсы усталыкъ келишгенине тюшюннгендиле.