Турист жолчукъланы юсюнден – жангы законопроект

Къырал Думагъа турист жолчукъланы юсюнден законопроект къараугъа жиберилгенди.

Турист жолчукъ деп жаяу, аякъ машиналада, лыжалада, атлада эм башха моторлары болмагъан затлада барылгъан жолоучулукълагъа айтадыла. Алада ажашмазча белгиле, солурча шинтикле неда жапмала салыргъа боллукъду. Документге тийишлиликде быллай жолчукъланы миллет тизмесин жарашдырыргъа белгиленеди. Хар бирине паспорт жарашдырыллыкъды, анда жолчукъну халы, аны тапландырылгъаны бла къалгъаны эм бу ишлеге жууаплыланы атлары жазыллыкъдыла. Андан сора жолоучулукъ Бир тизмеге кийирилликди.

Бу амалны хайыры бла турист жоллагъа дайым къаралгъанлай турлукъду, солугъанланы къоркъуусузлукълары бютюн тынгылы жалчытылынырыкъды. Бу жумушлагъа жууаплы уа толтуруучу власть органла, жер-жерли самоуправление органла неда энчи предпринимательле боллукъдула. Анга кёре жолчукъланы къураргъа эркинлик федерал эм регион властьлагъа, муниципалитетлеге бла энчи предпринимательлеге берилликди. Аны ючюн ала жамауат сервитутну низамы бла хайырланырыкъдыла, анга тийишлиликде жерни бла ол къырал иеликде эсе да алыргъа жарарыкъды. Алай бир эсгертиу барды – тереклени кесерге арталлыда жарарыкъ тюйюлдю.

Законопроектни мураты туризмни айнытырча эмда къыралны ичинде жолоучулукъла ырахатлы, сейир да болурча мадарла этиудю, деп билдиредиле республиканы Курортла эм туризм министерствосундан.