Терк файда - алдаулуду

Телефон бла сёлешип, адамланы алдап,  ахчаларын алгъан кезиуле, айхай да, чыгъа турадыла. Бу жол Нальчикде полициячыланы болушлукъларын Элбрус райондан эллижыллыкъ эр киши излегенди.

Анга сёлешген инвестицияла жаны бла менеджер болгъанны айтып, биржада файда тюшюрюрге боллукъду деген сылтау бла ол эр кишини талай кереге онтёрт миллион сомну банк счётлагъа жибертгенди. Андан сора уа тас болгъанды. Бу болум бла байламлы уголовный иш ачылгъанды.

Ич ишле министерствода жамауатны сакъ болургъа чакъырадыла, жорукъланы дайым эсгертгенлей турадыла. Алай эсе да, адамла хыйлачылагъа алданнган а этедиле. Аланы къапханларына тюшмез ючюн, терк окъуна уллу файда тюшерикди дегенча сёзлени эшитгенлей, телефонну салып къойсагъыз, игиди.