Мектепледе - Уллу Ата журт урушха жораланнган музейле

Кёп болмай Нальчикде, мектеплени таматаларыны юйретиу жаны бла орунбасарлары эм  музейлерини ишчилери къатышып,  «Школда Махтаулукъну музейин къурау эм ишлетиу» деген  семинар-кенгеш  болгъанды, деп билдиргендиле «115-чи атлы дивизия» деген  излеу отряддан. Быллай магъаналы проект излеу отрядны башчысы Олег Заруцкийни бла ара шахарыбызны   билим бериу департаментини бёлюмюню таматасы  Светлана Тхагапсоеваны башламчылыкълары бла бардырылады.   

    
Кенгешни башлай,  Светлана Таукановна  школлада  Уллу Ата журт урушха жораланнган музейлени къурау  жаш тёлюню патриот сезимин кючлерге ахшы себеплик этеригин чертгенди. Ызы бла  Нальчикни 7-чи эм  24-чю школларыны музейлерини таматалары  кеслерини ишлеринден хапар айтхандыла, излеу отряд алагъа болушханы,  Уллу Ата журт урушну заманларындан къалгъан кёп затла берип, байыкъландырыргъа себеплик этгени ючюн ыразылыкъларын билдиргендиле. Бюгюнлюкде алада   тюрлю-тюрлю  акцияла ётдюрюлгенлерин, жигитликни дерслерин да  бардыргъанларын белгилегендиле. 

Олег Заруцкий а  былтыр декабрьде къуралгъан отрядны юсюнден хапарлагъанды, мектепледе  музейле къуралыр ючюн къолларындан келгенни аямазлыкъларын да эсгертгенди.  

Россейни МВД-сыны Краснодарда университетини Нальчикде бёлюмюню музейини таматасы,  излеу отрядны келечиси  Евгений Кузьмин да  музейни къурау бла байламлы жумушланы толу ангылатханды, жыйылгъанланы къонакъгъа да чакъыргъанды.