Хыйлачылагъа алданып, эшикде къалмазча

Аманлыкъчыла хыйла бла ахча къоллу неда биреуню фатарына ие болур ючюн жангы амалланы къурай биледиле. Алагъа абадан адамла алданнган кезиуле уа, жарсыугъа, аслам тюбейдиле. Аны бла байламлы Роскадастрны регионда бёлюмюнде уллайгъан инсанлагъа фатарларын, мюлклерин къалай сакъларгъа боллукъларыны юсюнден эсгертиуле этгендиле.

Кертиси бла да, жаш адамлагъа тынч кёрюннген жумушланы таматалагъа толтургъан къыйын кёрюнеди. Тюрлене-тюрлене тургъан жорукъла бла законла, жашауну терк барыуу - аланы барысын да эсепде тутаргъа онглары жокъду. Ол а аманлыкъчылагъа хыйла бла аланы хазналарын къолгъа этерге жолну ачады. Роскадастрны регионда бёлюмюню башчысы Анна Тонконог белгилегенича, аланы бек магъаналы борчларындан бири адамланы мюлклерин сакълауду. «Аны ючюн абадан адамла жарсыула бла келселе, алагъа аслам эс бёлебиз. Чертирге сюеме, юйлени, фатарланы иелери мюлклери бла келишимле, сатыу-алыу дегенча ишле этилмезлерине чек салыргъа эркиндиле. Инсанны талай юйю бар эсе, бу амал бла ол аланы барысын да къоруулаяллыкъды», - дейди ол.

Алай бла журтну сатыугъа неда аны бла хаух бериуге чек Роскадастрны кесине бармагъанлай, Кёп жумушланы тамамлагъан аралада бла къырал жумушланы порталында салыргъа боллукъду. Адам бу жумушну Роскадастрны юсю бла тамамларгъа излеп, алай ары келирге онгу жокъ эсе, специалистни кесине чакъыраллыкъды, ол документлени жыйышдырыргъа да болушурукъду, алай аны ючюн тёлерге тюшерикди. Уллу Ата журт урушну ветеранлары бла къазауатда сакъатлыкъ алгъанла, сакъат сабийле, гитчеликден 1-чи къауумда сакъатла, 1-чи эм 2-чи къауумда сакъатла специалистни хакъсыз чакъыраллыкъдыла, ала бу льготагъа тийишли къауумгъа кире эселе, ахча тёлемейдиле.

Мюлкню сакълауну экинчи амалы уа былайды – аны иеси кеси болмагъанлай къырал регистрациягъа чек салыу. Аллай юй бла фатар ышаныулукъ къагъыт берилген адамну оноуу бла окъуна сатыллыкъ неда саугъагъа бериллик тюйюлдю. Специалистни чакъырыу бла байламлы сорууланы 8 (8662) 93-00-17 телефон бла сёлешип берирге боллукъду.