Кёрюмдюле озгъан жылдан игидиле

Элбрус муниципал районну тийресинде бир ненча кооператив ишлейди: СПК «Быллым», «Агропремиум», иеликни гитче формлары. 25 фермер мюлк, эм жамауат  2443 энчи юйюнде тутхан мюлк да.  Белгилисича, эл мюлкню эм айныгъан тюрлюсю  малчылыкъды. Районну эл мюлкюнде быйылгъы  жылны аллына 15,536 уллу мал эсепленнгенди.

 Жарсыугъа, энчи мюлк тутуп ишлетген предпринимательлени иги кесеги бийик налогланы эм багъаланы хар кюнден ёсе барыуларыны  хатасындан малланы санын кёбейтир онглары болмагъанын айтадыла.

 Районну мюлкюню башха тюрлюлеринде да болум, озгъан жыл бла тенглешдиргенде, аман тюйюлдю. Союлургъа деп ёсдюрюлген малланы ауурлукълары 5058 тонна болгъанды. Сютню бла жумуртхаланы юсюнден айтсакъ да, озгъан жылдан иги болгъандыла кёрюмдюле.

 Ёзенледе тирлик ёсдюрюлген жерлери районну 486 гектар болгъанды. Анда кёгетле ёсдюргендиле. Мал аш, нартюх да кереклисича битгенди.

 «КъМР-де эл мюлкню эм эл мюлк продукцияны сатыу-алыуун айнытыу» къырал программаны чеклеринде предпринимательствону бу тюрлюсюнде ишлерге сюйгенлеге субсидияла эм грантла халда болушлукъ этилгенди.

Районну эл мюлкюню юсюнден айтханда, мында иш кёллю жаш тёлю кёпдю. Башында сагъына келген мюлкню тюрлюлеринде озгъан жылдан иги кёрюмдюле болдургъандыла.  Быйылгъа  салыннган борчланы да жетишимли толтуруп, районну кёрюмдюлерин кётюрюр муратдадыла.