Келир заманны устазлары депутатлада къонакъда

КъМР-ни Парламентине психолого-педагогика жаны бла билим алгъан классланы окъуучулары къонакъгъа келгендиле. «Къырал сагъат» проектни чеклеринде депутатла бла тюбешиуге Нальчикни, Басханны, Зольск эм Прохладна районланы билим бериу учрежденияларыны  70-ге жууукъ окъуучусу келгендиле.

Тюбешиу Билим бериу, илму, физкультура, спорт эм жаш адамланы ишлери жаны бла комитетни башламчылыгъы бла къуралгъанды. Анга Контроль эм регламент комитетни башчысы Кансаланы Елена, Билим бериу, илму, физкультура, спорт эм жаш адамланы ишлери жаны бла комитетни башчысыны орунбасары Герман Шевчук, Парламентни аппаратны башчысыны орунбасары Аслан Хамуков къатышхандыла. Аны Билим бериу, илму, физкультура, спорт эм жаш адамланы ишлери жаны бла комитетни башчысы Нина Емузова бардыргъанды.

Жыйылыуну аллында уа, тёреде болгъаныча, жаш адамлагъа Парламентни мекямында экскурсия къуралгъанды.  

Эсигизге салайыкъ, психолого-педагогика классла былтыр къуралып башлагъандыла. КъМР-ни Жарыкъландырыу эм илму министерствосу тамамлагъан программаны чеклеринде окъуучула «Математика эм информатика», «Физика», «Химия», «Биология», «Тарых эм обществознание» жаны бла билим аладыла. Проектге жюзге жууукъ школчу къатышадыла.

Классла шабат кюн «Республикалы кёп профильли гимназияда» ишлейдиле. Жаш адамлагъа дерслени сынаулу устазла бередиле. Аланы устазны усталыгъына кёллендирир мурат бла уа тюрлю-тюрлю амалла хайырланыладыла, ол санда предприятиялагъа бла илму организациялагъа экскурсияла къураладыла,  профильли  проектле, конференцияла, семинарла, оюнла, мастер-классла бардырыладыла.

Жаш адамла бла тюбешиуню ача, Нина Емузова  бюгюнлюкде, педагогика жаны бла билим алыргъа сюйгенлени саны азайгъан кезиуде, быллай классла артыкъда магъаналы болгъанларын чертгенди.  «Устазланы тизмелерин билимли, хунерли жаш адамла толтурурларына ышанабыз. Кючлю, билимли, ишин сюйген устаз жаш адамланы къадарларында уллу жерни алады, аны жашаугъа кёз къарамын къурайды»,-дегенди.

Ызы бла Кансаланы Елена Парламентни тарыхыны, аны шёндюгю чакъырылыууну къуралыууну, фракцияланы, президиумуну  борчларыны юслеринден къысха билдиргенди.  Парламентде Жаш тёлю палатаны юсюнден да айтханды. Дагъыда законла чыгъарыучу органда Жамауат совет да ишлегенин, аны къауумуна сынаулу, билимли, халкъда хурмет этилген адамла киргенлерин, ол кенгешчи орган болгъанын да билдиргенди.

Парламентни 7-чи чакъырылыууну къауумунда эм жаш депутат Герман  Шевчукду. Анга алыкъа отуз жыл да толмагъанды, болсада ол жашауну ныхытлы жолларындан ётгенди: къазауатда болгъанды, тёрт кере контузия алгъанды, ол санда аскер операцияда да.

- Мен 23 жылымдан къатышама аскер операциялагъа, Таджикистанда снайпер болуп къуллукъ этгенме, ызы бла снайперлени къауумуна башчылыкъ этгенме, тюрлю-тюрлю жумушла толтургъанбыз, ол санда Россейни эм Таджикистанны оноучулары Владимир Путинни бла Эмомали Рахмонну тюбешиулеринде къоркъуусузлукъну жалчытыу ишге къатышханма, террористлеге къажау къазауат бардыргъанма. Алай Украинада энчи аскер операция башха къаугъалагъа бирине да ушамайды, мында душман башхады,  анда професионалла къазауат бардырадыла,-дегенди ол.

Герман Шевчук  аскер борчларын къолдан келгенича толтургъанын чертгенди. «Алай мен юйюрюм, Къабарты-Малкъар, Россей ючюн сюелгеними ангылагъанма. Дагъыда мен башчылыкъ этген къауумну аскерчилери ючюн жууаплылыкъны да сезгенме»,-дегенди ол.

Жаш депутат  Нальчикни 6-чы номерли школун тауусханын айтханды. Ол СВО-дан къайтхандан сора уа, республикагъа, халкъгъа къуллукъ этерге сюйгенди.  «Жашла анда сынагъанны мен кесим да кёргенме. Аны ючюн бир жанында къалалмагъанма»,-деп къошханды. 

Парламентни 7-чи чакъырылыууну депутатына сайлап, халкъы жанындан этилген  ышаныулукъ ючюн ыразылыгъын билдиргенди. «Тюрлю-тюрлю сорууланы тамамларгъа керекди, алай энчи аскер операцияны ветеранларына болушлукъну баш борчума санайма. Жашлагъа тутхучлукъ этерге, къатларында болургъа керекди»,-дегенди ол.

Аслам Хамуков а законла чыгъарыу ишни энчиликлерини, Парламентни контроль эм представительный борчларыны юслеринден билдиргенди. 

Тюбешиу андан ары ушакъ халда баргъанын айтырчады. Жаш адамланы депутатлагъа соруула берирге онглары бар эди. Ала уа кёп тюрлю болгъандыла – депутатха сайланыр ючюн къаллай экзаменле берирге кереклисинден башлап, айырыучула бла байламлыкълагъа,  законодательный башламчылыкълагъа дери.

- Депутатха сайланыр ючюн экзамен берилмейди, жаланда сайлагъан ишинги устасы болургъа, жамауат жашауда тири болургъа, адамлагъа болушургъа итинирге керекди, - деп жууаплагъанды Кансаланы Елена соруугъа.