Малланы жайлыкъгъа чыгъарырдан алгъа

Малланы жайлыкълагъа чыгъарырдан алагъа  аланы ветеринария жаны бла жумушларын жик-жиги бла тамамларгъа кереклисин Россельхознадзорну Шимал Кавказда регионла аралы управлениясындан эсге салып билдиредиле.

Жаз башында, малланы жайлыкълагъа эмда сабанлагъа жибергинчи дери, ала диспансеризацияны ётерге керекдиле. Ол санда къанны бла сютню тинтип, халлерин кёредиле. Ызы бла алагъа профилактика халда дарман (ол санда сууалчанладан да) бериледи, вакцинация да этиледи.

Тышына чыгъарыргъа талай кюн къалгъанда, маллагъа бичен бла салам ашатып башларгъа тийишлиди. Ол аш орунларына заран болмазча, сютлери да азаймазча этиледи. Дагъыда хант тузну кереклисича аллай бир берирге кереклисин унутмагъыз.

Малланы туякъларына да иги эс бурургъа керекди, ол санда тазаларгъа, артыкъ ёсгенин кесип кетерирге, жараларын да багъаргъа. Не аз да жара бар эсе, аны алай къояргъа жарамайды. Мал кеси аллына сау болуп къаллыкъ тюйюлдю, ол жеринден а микробла эмда башха заранлы затла аны къанына бла сютюне тюшерикдиле.

Малны туякъларын жара этерге боллукъ кёп зат барды. Мал орун неда арбаз тазаланмасала, алада чюй неда темир чыбыкъ болса да къоркъуу чыгъады. Дагъыда жайлыкъгъа кёчюрген кезиуде асфальт бла баргъанда, малны туякълары жаралы болургъа боллукъдула.

Тышында да аланы кёп заранлы зат сакълайды. Сабанлада чибинле бла губула эмда къуртла малланы онгларын аладыла, аурууланы кёчюредиле. Саскыла юркютюп, суугъа кирип неда юлкюле ичинде бугъуп турурча этедиле. Аны ючюн а ийнеклени сютлери азаяды, желинлери ауруулу болады, ирин этеди. Дагъыда исси кюнледе малланы ауана, салкъын жерлеге кёчюрюрге керекди.

Бу жумуш бла байламлы сорууугъуз бар эсе, Россельхознадзорну Къабарты-Малкъарда бёлюмюне барыгъыз неда сёлешигиз. Аны адреси: Нальчик, Ленин атлы проспект, 54, телефон номери: 8(8662)77-81-96.