Аурууланы заманында табыу – багъыуну мурдору

Ата журтну къоруулаучуну жылында республиканы Саулукъ сакълау министерствосу аскер къазауатланы ветеранларына диспансеризацияны ыйыгъын бардырады. Аланы саулукъларына битеу медицина учреждениялада къаралады. 

Диспансеризацияны ыйыгъын бардырыуну баш мураты-аскер къазауатлагъа эмда энчи аскер операциягъа къатышханлагъа болушууду. Аны хайырындан урушлада саулукъларына хата тюшгенлеге къараллыкъды, битеу керекли медицина болушлукъ этилликди. Башламчылыкъгъа Нальчикни ючюнчю поликлиникасы да къошулгъанды. Аны медицина профилактика бёлюмюню башчысы Нёгерланы Асият билдиргенича, келгенледен терк окъуна анализле алынадыла, ала кардиограмманы ётедиле. Диспансеризацияны борчу энди къозгъала тургъан аурууланы ала кюч алгъынчыгъа дери ачыкълауду, хроника арууланы селейтиудю, инсанланы бу къауумларыны жашауларын игилендириудю. Врачла аскерчилеге алагъа тап заманда къарайдыла, энчи эс жюрек-тамыр системаларын, солуу органларын, психика халларын тинтиуге бёлюнеди, ветеранла кёп ауур, къыйын болумладан ётгенлерин эсге алсакъ, ол бек магъаналыды. Андан сора да, аскерчиле бла отороларингологла, неврологла, травматолог-ортопедле, хирургла, урологла, окулистле ишлейдиле.

Диспансеризация район поликлиникалада да бардырылады. Кеслери алларына келалмагъанлагъа врачла юйлерине барадыла, керек болса, ала саусузлагъа олсагъатлай болушлукъ этедиле. Саулукъ сакълау министерство ветеранланы барысын да саулукъларын тинтдирирге, бу жумушха уллу кёллю болмазгъа чакъырады.