Шахарны айбатлыгъы - тазалыкъда

Шахарланы бла эллени тазалау эм айбатландырыу битеуреспублика айлыкъ башланнганды. Биринчилени санында анга Нальчикни мериясыны келечилери къатышхандыла.  

Администрацияны келечилери Тарчоков атлы орамны тазалагъандыла. Ол шахарны баш, адамла кёп жюрюген орамларындан бириди. Тазалау ишлеге шахарны администрациясыны, Горзеленхозну, ара паркны, управляющий компанияланы, департаментлени келечилери къошулгъандыла. Ала орамны кир-кипчикден, къышны ичинде жыйылгъан букъудан, чапыракъладан бла чырпыладан ариулагъандыла. Горзеленхозну баш инженери Хасан Тарчоков айтханыча, быйыл бу биринчи субботникди, анга битеу подряд организацияла чакъырылгъандыла, алай тазалау ишлеге хар сюйген да къатышаллыкъды. Бу орамда жангы юйле да бусагъатда кёп ишленедиле, аны ючюн къурулушчуланы къауумлары да юлюшлерин къошхандыла. «Мында къурулуш багуш да кёпдю, аны ючюн быллай башламчылыкъланы терк-терк къурай турургъа керекди, ол шахарыбызны кёрюмдюсюн ариу, айбат этерикди», - дегенди къурулуш компанияны келечиси Адам Тутуков.

Коммунал службаланы ишчилери уа автомобиль жолланы, чыракъланы тазалагъандыла. Субботникге жюзден аслам адам чыкъгъанды, ондан аслам техниканы хайырланнганды.

Тазалыкъны айлыкълары регионну битеу жерлеринде да бардырыллыкъдыла.