Жерни алырдан алгъа, чеклеге къараргъа тийишлиди

Жерлени сатыу-алыу бла байламлы жорукълагъа тюрлениуле кийирилгендиле, жерле кеслери эм алада ишленнген мекямла борчлу халда Къырал тизмеде болургъа керекдиле.

Къырал реестрде чеклени юсюнден жазыу жокъ эсе, аны кадастр эсепге салыргъа, алайда юй неда башха мекям ишлерге жарарыкъ тюйюлдю. Къурулушну, сатыу-алыуну юсюнден документлени алсала да, чекле белгиленмегенлери ачыкъланнганлай, къоншуланы араларында даулашла чыкъмазча, эсеплеу тохталлыкъды. Эм алгъа, битеу жерле да жамауат картада кёрюнюрге тийишлидиле, экинчиден а, жерни сатып алгъан инсан ол къалайда болгъанын, аны ёлчемин, кадастр багъасын да билирге керекди. Ол а жангызда чекле шарт белгиленнген эселе боллукъду, деп ангылатады Росреестрни республикада бёлюмюню башчысыны орунбасары Кучмезланы Мариям.  

Хар инсан да жерини чеклерине Росреестрни кадастр картасына къарап кёраллыкъды. Адамлагъа таплыкъгъа бу жумушну къырал жумушланы порталында да толтурургъа боллукъду. Чеклени тохташырыр ючюн, бир къырал реестрге заявление жазаргъа, анга чеклени планын да къошаргъа тийишлиди. Аны кадастр инженерле келишимде айтылгъан болжаллагъа кёре этерикдиле.